Hitzarmen horren bidez, eremu osoaren –Lamuza parkea osatzen duten lursail eta eraikinen– erabilera eta gozamena doan lagatzea arautzen da. Parkea leku garrantzitsua da, balio historikoa eta ondarearekin eta ingurumenarekin lotutakoa dituelako eta udalerriko gizarte eta kultura bizitzaren ardatz nagusi delako.
Hitzarmenak esparru juridiko eguneratu eta egonkorra ezartzen du, aurreko hitzarmenak ordezten dituena, eta parkearen udal kudeaketa bermatzen du; hasiera batean, hogei urterako, baina iraupen bereko ondoz ondoko aldietan luzatzeko aukera dago. Eremuaren erabilera publiko eraginkorra bermatzea da helburua, herritarren beharretara egokitua eta gunearen babesarekin eta kontserbazioarekin bateragarria.
Lagatako higiezinak interes publikoko erabileretarako baliatuko dira, ahal dela kultura edo kirol erabileretarako, bai eta ondasunen izaerarekin eta Laudioko Udalari legez esleitutako eskumenekin bateragarriak diren beste helburu publiko batzuetarako ere. Ez da inola ere jasoko instalazioen bizitegi
erabilerarako aukera, Foru Aldundiaren berariazko baimena duten salbuespenezko kasuetan izan ezik.
Laudioko erdialdean dagoen Lamuza parkeak paisaia nabarmenak eta eraikin historikoak ditu, hala nola Lamuza jauregia, Kasinoa eta Musika Etxea. Jatorrizko eraikina izan ezik, zeina udalaren titulartasunekoa baita, eremua Arabako Foru Aldundiaren jabetzakoa da. Aldundiak 1975ean erosi zuen parkea, eta Laudioko Udalari laga dio haren erabilera, duela 40 urte baino gehiagotik.
Azken urteotan, Arabako Foru Aldundiak inbertsio handiak sustatu ditu multzoa birgaitzeko eta haren balioa nabarmentzeko; besteak beste, Kasinoa eta Musika Etxea sendotzeko obrak egin dira, bai eta Lamuza jauregiaren barnealdea zaharberritzeko eta irisgarritasuna hobetzeko lanak ere.
Azken jarduketa hori iaz amaitu zen, eta 2,76 milioi euroko inbertsioa behar izan zuen, eta, horrekin, parkeko elementu esanguratsuenen birgaitzea amaitu zen. Izan ere, 2020an eraikinaren estalkiak, fatxadak eta berokuntza sistema berritzeko lanak egin ziren (2,8 milioi euroko aurrekontua), eta, aurretik
Musika Etxea eta Kasinoa birgaitu ziren (3 milioi euro). Horrela, Foru Aldundiak 9 milioi euro inguruko inbertsioa egin du, guztira, Lamuza parkeko eraikinetan.
Hitzarmenak Laudioko Udalari esleitzen dizkio eremuaren kudeaketa arrunta, mantentze lanak eta kontserbazioa, bai eta funtzionamendu, garbiketa eta kontsumo gastuak ere. Bestalde, Arabako Foru Aldundiak, jabea denez gero, egiturazko jarduketak hartuko ditu bere gain, eta egindako obren ondoriozko balizko akatsak zuzenduko dituela bermatuko du.
Jarraipen batzorde tekniko bat sortzea ere ezartzen da hitzarmenean, bi administrazioetako arduradun teknikoek osatua. Batzorde hori arduratuko da higiezinen egoera ikuskatzeaz eta behar bezala kontserbatzen direla ziurtatzeko beharrezkoak diren jarduketak koordinatzeaz.
Hitzarmenaren bidez, Arabako Foru Aldundiak Laudiorekiko foru konpromisoa betetzen amaitzen du: Lamuza parkeko higiezin historiko guztiak birgaitzea eta haien balioa nabarmentzea, eta herritarren gozamenerako erreferentzia eremu gisa finkatzea, udalerriko kultura jardueraren eta gizarte kohesioaren eragile gisa.