Irria eta negarra eragin dizkidaten zenbait hitz irakurri ditut Araban gehien saltzen den egunkarian, kirol apustuen gaineko bi orrialdeko erreportaje batean. Utzidazue, bada, bertara dezadan lehen perla horietako bat, euskaratu bidenabar: “Kirola intentsitate handiagoz bizi nahi duen jokalari sozial baten bila gabiltza”. Kirolbet enpresaren marketin eta komunikazio arduraduna den Beñardo Elorzen hitzak dira arestikoak.
Irriaren gazia eta negarraren gozoa uztartzen jakin duten honako hitz hauek Eneritz Alonsorenak dira, Reta enpresaren marketin eta komunikazio arduradunarenak: “Retako langileek prestakuntza espezifikoa jasotzen dute edozein joko-arazo antzemateko: zoritxarrez gure jardunari berez dagokion errealitatea da, baina geu gara lehenbiziko interesatuak ludopatia kasurik egon ez dadin”.
Erreportajearen izenburura eraman ditu, hain zuzen, azken hitzak kazetariak: “Geu gara lehenbiziko interesatuak ludopatia kasurik egon ez dadin”. Ironiarik gabe (nekez sumatuko duzue ironiarik Araban gehien saltzen den egunkariko erreportajeetan; are nekezago, lerro-buruetan).
Eta horra ironiarik handiena: ironiarik gabe aritzea.
LAGUN AGURGARRIA:
Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide