Artziniegako Santxotena Tailer-Museoak, urtero bezala, bere jaiotza bildumaren erakusketa ireki zuen pasaden igandean. “Munduko Jaiotzak” bildumaren XIII. erakusketa da, eta oraingo honetan 703 jaiotza ikus daitezke museoan, iazko kopuruaren bikoitza. Museoaren zuzendaria, Teresa Lafragua, da bildumaren jabea eta sortzailea, eta txiki txikitatik hasi zuen jaiotzak biltzeko zaletasuna. Erakusketan Kolonbia, Kuba, Australia, Tanzania, Txina edo Georgia bezalako leku urrunetan egindako jaiotzak aurki ditzakegu, baina baita gure inguruko herrialdetakoak ere. Egurra, zeramika, beira, portzelana,.... hainbat materialetako piezak osatzen dute bilduma.
Aurtengo berrikuntzen artean Lladró Balentziako portzelana etxeak ekoizturiko hainbat jaiotza aurkituko dugu, eta haien artean PabloVI. Aita Santuarentzako bereziki eginiko hiru errege magoen irudi batzuk. Originalak, Aita Santuak berak ilargia lehen aldiz zapaldu zuten hiru astronauta ipar amerikarrei oparitu zizkien, Armstrong, Aldrin eta Collinsi hain zuzen.
Jaiotza bakoitzaren atzean istorio bat dago, eta berauek ezagutzeko modurik onena, Artziniegara gerturatu eta erakusketa bisitatzea izango da. Erakusketa azaroaren 26tik urtarrilaren 31ra bitartean egongo da zabalik, ostegunetik igandera goizeko 11:00etatik 13:30etara eta arratsaldeko 16:00etatik 18:30etara. Prezioak ondokoak izango dira: Sarrera arrunta 5€, erretiratuak 4€, Ikasleak 3€ eta 6-12 urte bitarteko umeak 2€.