10 urte pasa omen dira Ojos de Brujo taldeak “Vengue” beren lehen lana atera zuenetik, eta urteurrena ospatzeko beren ibilbidea laburbiltzen saiatzen den diska bat atera dute, “Corriente Vital”, kasu honetan ere DVD, disko-liburu, eta osagarri guztiekin. Baina agian disko honen ezaugarririk nabariena beren agurra suposatzen duen diskoa dela izan daiteke. Hala da, Ojos de Brujo badoa, eta zutabetxo hau haien ibilbideari omenalditxoa izan dadila.
Ojos de Brujo hainbat musika estilo bateratu ditu beren lanetan, beti ere flamencoaren pisu oso handi batekin, eta nire ustez ere hainbat entzule estilo horien aurrean izan zitzaketen beldurrak gainditzen lagundu duen taldea da. “Vengue” diskoan Marinak eta Dani (Macaco)-k egiten zuten bikoteak indarez janzten zituen abestiak. “Bari” konfirmazioa izan zen, Macacok taldea utzi eta bere bakarkako proiektua jorratzen zuen bitartean (arreta berezia merezi du El Niño de la Pinturas-en portadak). “Techari” izan daiteke agian beren lanik landuena, bidaietan ikasitako gauzak musikatzen dituen diskoa (indiako Tablak, kubatar tronpetak,...). “Aocaná” izan da again beren lanik ahulena, naiz eta Ojos de Brujoren izaera hor mantentzen den. Txosnetan, Topaguneetan, aretoetan eta jaialdietan ikusi ahal izan ditugu, eta beti gozagarri. Bakarkako lanetara itxaron beharko dugu, horrelako musikariek fruitu gehiago emango baitituzte.
Beren azkeneko diskoa, egia esan, ez dut uste beren ibilbidearen laburpen eta omenaldi hoberena denik, hainbat artista ezagunekin egiten dituzten bertsioak beren erroak galtzera eramaten baitituzte abesti asko, Estopa taldearekin egiten duten “Na en la Nevera” edo Amaralekin egiten duten “Corre Lola” adibidez. Norberak bere lana nahi duen bezala eraldatzeko eskubidea dauka, ez naiz ni horan sartuko, baina “Corriente Vital” edo “Todos Mortales” abesti berriekin geratzen naiz, eta nola ez Get Up, Stand Up abestiaren bertsioarekin.