Gabonak badoaz eta ezin dut aukera pasatzen utzi eta gabonetako abesti bat jarri behar izan dut. Batzuek posez bete eta beste batzuk amorrarazten dituen urteko garai honek baditu ere bere ereserki musikalak, eta horiek indartze aldera nire ekarpena egiteko zutabetxo hau baino aukera hoberik ezin nuen aurkitu. Gainera bide batez aspaldian zorrotik ateratzeko zain zegoen musika taldea ateratzeko balio du, primeran beraz.
La Pegatina Kataluniako errunbaren oraina dira. Ez dira ordezkari bakarrak, noski, asko dira eta oso izaera desberdinekoak errunba bere jatorrizko eran edo hainbat erritmorekin nahasturik jotzen duten taldeak. Batzuk aipatzeko Amparanoia, Muchachito Bombo Infierno, Dusminguet, Manu Chao bera edo zergatik ez, guztien aitona dena, Peret bera.
La Pegatina 2003an sortutako taldea da. Sound system abizenarekin eta bakarrik hiru taldekiderekin hainbat eta hainbat errekopilazioetan abestiak sartzen joan ziren 2007 Al carrer! Diskoa atera zuten arte. 2009an Via Mandarina beren bigarren lana atera zuten eta abesti horiekin ibili dira gora eta behera hainbat herrialdeetan zehar beren dantza eta jairako erritmoak sakabanatuz. Orain beren hurrengo diskoa izango dena grabatzen ari dira eta beraz beraietaz hitzegiteko aukera gehiago egongo dira. Momentuz honako abesti hau erabili zuen pilak berriz ere lanerako kargatzeko.