Jorge Martin Montenegro argentinarrak (Azysa Conor) irabazi zuen atzo Laudioko afizionatuentzako txirrindularitza lasterketa. Proba lehiaketa euskaldunarentzako puntuagarria eta baliogarria da, eta bertan, Montenegrok duela aste bat, pasaden astebukaeran, erakutsi zuena baieztatu zuen, Caja Cantabria Sari Nagusia irabazitako gizonak sasoi hobeagoan dagoela egunak pasa ahala. David Gutierrez (Bidelan-Kirolgi) ailegatu zen helmugara bigarren, ahalegin txalogarria eginez lasterketa luzean zehar.
Sei txirrindulari izan ziren probaren protagonistak, paradisuko loriatik hurbil geratu zirenak: Kneppers, David Gutierrez, Maeztu, Larrinaga, Aitor Gonzalez eta Montenegro bera. Guztiek helmugatik 30km-tara sortu zen ihesaldian sartu ziren, tropelatik nahikotxo aldenduz, eta gerora ezin gaindituzko tartea bihurtuko zena.
Mugimendu eta estrategia asko egon ziren aipatutako “cow boy” ardigaldu hauen taldetxoan, baina Garateko bortutik azkenengo igoeran, Gutierrez eta Maeztuk aurretik egindako ahalegin estralurtarra ordaindu zuten, bigarrenak lehenengoa baino gehiago, Maeztu atzeratuta geratzen zen bitartean, Gutierrez helmugara argentinarrarekin sprintagatik borrokatzeko behar besteko indarrekin ailegatu baitzen.
Montenegrok konfidantzaz kargatuta zirudien, goiz hartan buru eta hanka onak zituela jakinda, eta horregatik bere taldea jo eta ke aritu zen sokatik tiraka, tropelaren egitura luzatu eta tenkatu nahian. Egundoko itzurpena sortu baino lehen, sortu ziren gainontzekoak suntsitu zituzten, errepideko metro eskat bat ere oparitu barik. Lasterketaren erdiko unera aldera, minutu eta erdiko abantaila zuen eskapadaren bizitzarekin akabatu zuten, baina artean Montenegrok lasai zihoan tropel handiaren babespean.
Tropelako aurrekoek mugitzen ziren, eta asko gainera, inor ez zuen atzeko tokietan egon nahi, eta egun horretako benetako ihesaldi handia sortu zenean, Montenegro azken posizio madarikatu horietan zegoen, hori bai, trankil-trankil, asko abaildu ezta estresatu barik. Maeztu eta Gutierrez, Bidelaneko txirrindulariak, aurretik minutu batetara zituen, baina Garateko hirugarren igoeran topera eragin zien pedalei, tarteko Aldana batekin bat egiten. Hauek ere baztertu zituen, eta direnak eta ez direnak zur eta lur utzirik, lasterketa buruarekin bat egin zuen jaitsieran. Respalditzako muinoan azkenengo erasoa egin zuen heriozko zigor-ukaldiarekin lagunkideak infernuratuz.
Nabarmendu eta goretsi behar da Jon Larrinaga herriko txirrindulariaren agerraldia, indartsuenekin azkenengo unetara arte eutsi zuelako, lasterketa amaieran meritudun 5. postua lortuz.