Larunbatean, herenegun, urtarrilak15, Euskal Herriko Hockey Salako Txapelketaren lehenengo jardunaldia jokatu zen Laudion. Laudioko kiroldegian jokatutako lehenengo fase honetan, lau taldek parte hartu zuten: Donostiako Atletikoa, Getxoko Jolaseta, Santo Tomas Lizeokoa eta Laudioko taldea, Ganbegi 6-2.
Itxuraz anfitrioiak ziren faborito nagusienari, Donostiko Atletikoari, aurre egin ahal zioten bakarrak, eta pelikula honetan bere paperari eutsi zioten, toma faltsu edo txantxa barik.
Partiduak 10:00etan hasi ziren, eta arratsaldekoak 18.00etara arte luzatu ziren. Hiru partidu jokatu ziren goizean zehar, lehenengo biak Ganbegi eta Atlekiko taldeen goleadekin itxi ziren, biek 6-1 garaitu baitzituzten beren arerioak, eta eguerdiko 13:30ean txapelketan zehar ikusmin handiena piztu zuen norgehiagoka ailegatu zen, aurreko bi talde horien arteko lehia. Partidua 7-4 amaitu zen, Laudiokoen porrotarekin zoritxarrez, nahiz eta partiduaren zati handienean jaun eta jabe izan. Garaio familiak espektakulu erakusgarria eskaini zien zaleei, Peio, Galder eta Endikaren eskutik, Endika Ganbegiaren jokalaririk gogotsuena eta biziena izanda.
Laudioko taldeak, Ganbegi 6-2k, hainbat baja edo ausentzia zituen, baina gurutzerik gabeko bizitzarik ez dagoenez, Garaio eta Suarezen ez egote gertagarriak gainditu behar zituzten. Ruben Martinezek aurten lehenengo aldiz jokatzeko aukera izango zuen eta Ruizi eta Etxebarriari (jubenil taldeko jokalariak) jokatzeko aukera hel zekiekeen.
Ganbegik partidua aurretik hasi zuen, Peioren gol goiztiarrari esker, baina minutuak pasa ahala eta Atletikoko kapitainaren golen erruz, atzetik eta erremontatzera behartuta eman zituzten gainontzeko minutuak. Donostiarren kapitainak, Emilio handikoteak, defentsa lanetan bikain aritzeaz aparte, hiru gol sartu zituen penalti-kornerren bidez, eskuadratik, prezisio eta ziurtasun erakustaldia eginez.
Partidua gatazka izan zen, eta arbitro titularrak partidutik haserretuta alde egin zuen, jokalariak bertan bera utzita eta Donostiako zale bati bere txilibitua gainera botata, bere lana era egokiago batean egiteko gai bazen zelaira bere ordez jaisteko eskaintza eginez. "Txefo" Laudioko arbitroak hartu zuen bere lekua, hockeyan gutxitan eman den gertakizun lotsagarriari konponbidea emateko. Donostiako jokalariak etengabe kexaka eta haserre aritu ziren, bereziki Hectorren taktikaren kontra, bolak arerioen oinen kontra bidalita faltak probokatzen baitzituen.
Ganbegik txapelketa bigarren lekuan amaitu zuen, eta Atletikoak lehenengo tokian, horregatik biak igaroko dira Donostian hil honetako 22an jokatuko den bigarren txanpara. Atletikoak Ganbegi garaitzeak txapelketaren norabidea markatu zuen, partidu horretatik aurrera biek bere arratsaldeko partidu guztiak irabazi zituzten eta.
Txapelketa garrantzitsua izan da Ganbegi taldearentzat, eskaparate itzela, eta nahiz eta belarreko zelaietan jokatzen den ligan arreta jartzea komeni zaien, esaera zaharrak esaten duen legez, egizu on, ez jakin arren non.