Atzo, Gorbeialde elkartekoek, Gatik erakundearen laguntzarekin egin duten Arratia-Nerbioi eskualdeko lehenengo sektorerako plana aurkeztu zuten Orozkon, Donibane aretoan. Ignacio Casasek, Gatik-eko ordezkaria, hitzaldia eraman zuen arduraduna izan zen, eta beraien proiektuak dituen helburuak eta horiek lortzeko aplikatu nahi dituzten neurriak azaldu zituen.
Beraien proiektuaren funtsa Arratia-Nerbioiko lehen sektorea, abeltzaintza eta nekazaritza berpiztea da. Gaur egun, eskualde honetan, orokorrean Euskal Herri osoan gertatzen den moduan, gazteek ez dute jaso adinekoengandik lekukoa, eta lehen sektorea, "sektore hila edo erdi marjinatua" da.
Asmo handiak dituen proiektua indartsua bada ere, oraindik garapen bidean dago. Helburua, eskualdeko nekazariei euren teknikak hobetzeko aukera emango duen eskola aurrerakoia sortzea da, Europako nekazaritza eskola handienen parean egongo dena. Euskal Herriko erakunde publikoen diru-laguntza jasoko luke, inbertsio oso handia izango litzatekeelako. Behin eskola hori martxan egonda, lortutako diruak eskolaren biziraupena ziurtatuko luke hurrengo urteetan. Gainera, beraien asmoa ez da nekazarien egunerokotasunetik urrun dagoen eskola sortzea, baizik eta nekazarien lana babestea eta beraien produktuei irteera edo merkaturatze duina ematea.
Bailarako produktuak, bereziki hemengo abereen okela, merkaturatu nahi dituzte, Eusko Labelaren antzeko jatorri-izendapena sortuz. Produktu ekologikoen ekoizpena indartu nahi dute, eta desagertzeko zorian dagoen "terreña" behi-arraza berreskuratu. Krisialdi egoeratik atera nahi dute zonaldeko lehen sektorea era egokian bideratutako marketina eginez.
Aretoan egon ziren gehienei, elkarte honek proposatzen duen proiektua "utopia" edo "ezin bideratu daitekeen egitasmoa" iruditu zitzaien. Orozkoko abeltzain eta nekazariek ez dute uste beraiei espresuki onura ekarriko dien proiektua denik, betiko aberatsak aberatsago bihurtuko duen plana baizik. Hitzaldiaren aurkezleek bat baino gehiagoren kritika latzak entzun behar izan zituzten.