Orozkoko museoak kirola eta kultura biltzen dituzten lau mendi-ibililaldi antolatu ditu aurten. Zailtasun eta arrisku gutxiko txangoak dira, gehiegizko sasoi fisikorik eskatzen ez dutenak, beraien helburua ez delako jendea ariketa fisikoa egitera mugitzea, baizik eta Orozkoko mendi eta gune naturalek duten ondarea edo xarma erakustea. Museotik aterako dira goizeko 08:30ean eta 12 urte baino gehiago duen pertsona orori daude zuzenduta.
Lau irteera hauetan, Orozkoko haranean ospe edo edertasun aparta duten tokiak eta paisaiak bisitatuko dira: Neberabarriko elur-zuloa, Kolometaren gailurraren inguruko dolmenak edo hileta-monumentuak, Itxinako kobak eta euren ondoko gune mistikoenak, eta azkenik, Untzueta mendia eta bere gaztelua.
Larunbat honetan azken irteera izango da, Untzuetako gaztelura. Azken urteetan egin diren ikerketa arkeologikoek gaztelua XII. eta XVI. mendeen artean eraikitakoa dela zehaztu dute. Kokapen estrategikoa duen gaztelua da, Gaztelakoek betidanik bereganatu nahi izan dutena. Bataila asko gertatu dira han, eta Orozkoko herritarren kondairek bereziki aipatzen dutena gaztelakoek orozkoarrek inoiz ikusitako katapultak erabiliz piztu zutena da.
Irteera hau baino lehen, herenegun, Itxinaren ingurukoa egin zen. Itzulegor, Axlaor eta Supelegorreko Mariren kobak bisitatu ziren, eta bereziki azken honekin eta euskal jainkosarekin lotura duten ezin zenbatuzko mitoak eta legendak kontatu ziren.
Txango hauetan kontatzen den informazioa balio handia dauka, inguruko pertsonei galdetuz lortutakoa baita, urteetan zehar ahoz aho igorritakoa. Gida lanak Felix Mugurutzak egiten ditu, Aunia euskal kultura aldizkariaren koordinatzailetako batek. Historialaria eta etnografoa da, Euskal Herriko eta bereziki eskualde honetako mitologia eta tradizioen zalea dena. Hainbat lan eta artikulu publikatu ditu eskualde honetako toponimia eta geografiaren inguruan.