Laudio itzel ari da aurten hirugarren mailako txapelketan. Ligako aurrena da, bigarren sailkatuak, Club taldeak, baino bi puntu gehiago izanda. Oraindik ez du partidurik galdu. Dirudienez, urte askotan xahututako diru-kopuru neurrigabe eta anormalek, talde elitista bati dagozkionak, orain dela asko eman behar izan zituzten emaitza onak ekarri dituzte.
Zaila egiten zaigu zaleoi Laudioko taldea hain egoera ona eta lasaian ikusi genuen azkenengo aldiaz oroitzea. Denboraldi honetako fitxaketek eta taldeak aurretik zuen jokalari-talde apartak, behar zuen bultzada edo laguntza eman diote taldeari. Emaitzak jokalari guztiek egindako lanaren ondorioa izan arren, Aitor Ramos eta Iker Pastrian aurrelariak eta Jose Carlos Gonzalez atezaina, gainontzekoen gainetik nagusitu dira. Pastrian, zazpi golekin, hirugarren mailako laugarren multzoko golegile nagusia da.
Pasa den larunbatean, jarraian irabazitako zortzi partiduen aldia hondatu egin zen. Ellakuriko zelaian, Lagun Onak talde gipuzkoarraren aurka, Laudiok ezin izan zuen puntu bat baino gehiago eskuratu (3-3).
Norgehiagoka latza izan zen eta Laudiok gorriak ikusi zituen. Taldeak aurtengo lehenengo porrota jasotzeko arriskua ikusi zuen. Pastrianek lehenengo gola sartu zuen laudioarrentzat, baina gipuzkoarrek aurki berdindu zuten partidua. Jasotako gol honek laudioarren konfiantza eta morala zeharo anabasitu zuen, eta ezer baino gutxiago egin ahal izan zuten etsaiaren atera hurbiltzeko, eta are gutxiago gipuzkoarren etengabeko erasoak gelditzearren.
Larrainzarrek, Laudioko atzelaria, gola sartu zuen bere taldearen atean, eta horren ostean, gipuzkoarrek euren hirugarren gola sartu zuten. Dena galduta zegoela zirudien, baina Arrizabalagak eta Pastrianek berdinketa ezartzen zuten golak sartu zituzten. Pastrianen gola arras polita izan zen, aurkako atezainaren irteera makala ikusita, baloia goitik sartuz.
Joku txarra izan zen Laudiok erakutsitakoa, oparotasuna eta dirdiraren kontrakoa, baina sarri esaten den legez, hobe puntu bakarra eskuratzea partidua galtzea baino. Dirua bezalakorik ez dago aldapak berdintzeko.