Laudioko jende asko hurbildu zen Eibarko Astelena pilotalekura Arkaitz Eskuzak, 18 urte bete berri, profesional gisa jokatu zuen lehen partida ikustera. Laudiotik hiru autobus abiatu ziren Eibar aldera. Pilotariak bere herritarren animoa izan zuen eta lagunen pankarta batek hartzen zuen pilotalekuaren errebotea: “Ametsak egia bihurtuz, Egurre Arkaitz”.
Eskarmentu handiko pilotaria izan zuen bere ondoan, partida osoan eramaten jakin zuena eta erritmo egokiak ezarri zituena. Hasieratik, aurretik jarri ziren eta Zaratamokoak pilota ederrak utzi zizkion bere estreinaldian konfiantza hartzeko.
Dario eta Arbizu ia beti atzetik joan ziren, Elezkanok eta Ezkuzak kontrolpean izan baitzuten norgehiagoka. Norgehiagokako faseren batean, errioxarrak sake indartsuekin min egin nahi izan zuen eta horrek Arkaitzen zenbait huts ekarri zituen.
Normala den bezala, 18 urterekin eta debutaren egunean, akatsak izan zituen. Horiek guztiak leundu eta profesional gisa hazten jarraitzeko irakaspena dira, baina dena dauka arrakasta lortzeko, hainbat ezaugarri baititu, hala nola zer nahi duen jakitea, lotsagabekeria, nortasuna eta ondo hornitutako burua.
Eskuzak bere debuta gozatu zuen Elezkanorekin Eibarko Astelena pilotalekuan, eta une hau dastatzeko ia astirik gabe, igandean frontoira itzuliko da. Igandean Donostiako Atano III.a pilotalekuan jokatuko den lehen partidan jokatuko du Expositorekin batera Asier Agirre eta Martxel Iztuetaren aurka.
Ibilbide berri baten hasiera da Arkaitz Eskuzarentzat, atzean geratuko dira eskola mailako partida haiek Herriaren ordezkatuz jokatzen zituena, beranduago, federatu mailan Joko Alai taldearekin jokaturikoak, Olgetan ordezkatuz jokatutakoak eta azkenik Lemoarekin lorturiko Bizkaiko Txapela.
Ibilbide luze eta oparo baten hasiera baino ez dadila izan; ZORIONAK ARKAITZ!