Hezkuntza arloarekin lotutako teknologia ikastaroa egingo da Bilboko Euskararen Etxean, ekainaren 22an eta 23an. Publiko orokorrari zuzendutako 12 ordutako ikastaro teoriko-praktikoa izango da, Azkue Fundazioak eta Talaios kooperatibak elkarlanean landutakoa.
Gaitasun digitalak: aro digitalerako heziketa
Hiru gailanduko dira ekaineko ikastaroan; batetik, gaitasun digitalaren markoa -DIGCOMP-, irakasleei eta ikasleei eskatzen dizkion gaitasunak ezagutzeko eta lantzeko tresnak emanez; NIA (PLE) zer den eta hori eratzeko tresna eta estrategia posibleak landuko dira; eta bizi osorako formazioa eta joerak aztertuko dira. Hiru saiotan banatuko da ikastaroa; ekainaren 22an, ostirala, 10:00etatik 14:00etara eta 15:30etik 19:30era; eta ekainaren 23an, larunbata, 10:00etatik 14:00etara. Ikastaroa Talaios Kooperatibako kideek gidatuko dute.
Izena ematea doan da baina parte hartzaileek Azkue Fundazioaren webguneko inprimakia bete behar dute.
'Sartu gurekin teknologiaren ur handitan'
Publiko orokorrari zuzendutako hainbat ikastaro eskaini dituzte dagoeneko Azkue Fundazioak eta Talaios kooperatibak, elkarlanean. Hilero, teknologiarekin lotutako doako ikastaro bat egiten da Bilboko Euskararen Etxean.
Jendearen formakuntza teknologikoan laguntzeko asmoarekin jarri da martxan proiektu hau, horrela azaldu dute antolatzaileek: "Sarritan teknologiaren mundua informatikariekin bakarrik erlazionatzen da, baina mundu guztiarentzat da erabilgarria; ikasle zein irakasle, zientzialari, soziologo… Edozeinentzat aproposak dira doako ikastaro hauek; oinarrizko gauzak era teoriko-praktikoan landuko ditugu ikuspuntu kritiko batetik". Mundu digitala ulertzen lagunduko dute ikastaroek, oinarrian "sormena, inspirazioa eta berrikuntza" izanik.