Urtekari feminista sortu du Bor-bor Aiaraldeko feminismo elkarteak. Arabako Foru Aldundiaren diru-laguntzari eta Aiaraldeko udalen babesletzari esker plazaratu dute argitalpena, eta 64 orriko liburuxkan urteak eskualdean zein Euskal herrian utzitako gertaera garrantzitsuenak bildu dituzte. Horrez gain, Bor-bor solasaldi zikloko zenbait edukiren laburpenak pilatu dituzte nola elkarrizketa hala erreportajeetan. Ildo beretik, espazio eta proiektu feministei ere egin diete tartea; Bor-bor elkartearen bestelako ekimenen berri emateko.
Gainera, elkarrizketa edo erreportajeek QR kodeak dituzte, solasaldiaren podcasta audio formatuan entzuteko Youtubeko kanalerako jauzia klik bakarrean egiteko. Euskarazko argitalpena doakoa da, eta digitalki ere irakurri edo deskargatu daiteke. Era berean, hainbat aurkezpen publiko egingo dira datozen astean eskualdean zehar. Hauek izango dira, zehazki, hitzorduak:
- Aretako Kultura Etxean
- Laudioko Kultura Etxean
- Amurrioko Kultura Etxean
- Okondoko Kultura Etxean
- Orozkoko Kultura Etxean
- Urduñako Alondegian
- Artziniegako udaletxean
- Aiarako udaletxean
- Arakaldoko udaletxean
- Arrankudiagako Gizarte Etxean
Guztira, 400 kopia banatu dituzte eskualdeko ondorengo tokietan. Emakume elkarteek, berriz, Berdintasun Arloen bidez eskuratu ahalko dituzte aleak.