Santa Luzia Abesbatzak fundazioa sortu berri du: Arte-Ón. Proiektua herriko kultur taldeei aurkeztu asmoz sustatzaileek agerraldia egin zuten joan den larunbatean, maiatzak 15. Abesbatzeko zuzendari Felix Primok egitasmoaren nondik norakoak azaldu zituen, elkarteko kide Satur Gonzalez de Tejada eta Beatriz Zurimendi ondoan zituela. Arte-Ón fundazioa antzerkia, musika eta dantzaren inguruan lan egitera dator “Laudioko kultur bizia are eta gehiago indartzeko asmoz”. Horretarako bost tresna aurreikusten dituzte: ikastxe bat, kantu koralaren sustapena, jendarteratzea, onegintzazko lana eta ikerkuntza. Musika, antzerkia eta dantzaren irakaskuntzarako eskola ofizial bat sortzea dute helburu.
2008. urtetik hezur-mamitzen joan den proiektua da laudiar abesbatzak aurkeztu duena. Felix Primok azaldu zuenez musika, antzerkia eta dantza bilduko lituzkeen eskola ofiziala dute xede. Horretarako lanak “oso aurreratuta” dituzten arren ez zuen eperik jarri nahi izan. “Udal gobernuaren konpromiso sendoa daukagu lokalen aferan eta gainerako talde politikoak ere alde ditugu”. Eusko Jaurlaritzaren “zigilua” ere badutela eta proiektu kurrikularra, zein eskolak eskeiniko lituzkeen gaiak zehaztuta daudela adierazi zuen. Oraingoz baina, ez dituzte zehaztasun horiek publiko egin nahi. “Gaurkoa lehen aurkezpen saio bat da, gero taldez-talde aurkezten joango gara”. Hala ere, herriko bi akademiarekin harremanetan izan dira jada: Danzas Nuria eta Landaluze Musika Akademiarekin. Izan ere, abesbatzako zuzendariak argi utzi nahi izan zuen beraien zioa “elkarlana eta integrazioa” dela eta ez “xurgatzea”. Hots, gainerako elkarteen lekua hartzera ez datozela eta “eskutik” joan nahi dutela gainerako taldeekin proiektu haundinahi hori gauzatzeko. Egitasmoaren tamainaren aurrean ere, “pausoz-pauso” joateko beharra azaldu zuen Felix Primok.
Hezkuntza eta finantziaketa
Ikastetxe berriak irakaskuntza ez arautua eskainiko luke, egun Musika Eskola ofizial batek ematen duena, alegia. Berritasuna hiru disziplina eskola berean biltzea litzateke: musika, antzerkia eta dantza. Egun, ez da horrelakorik gure erkidegoan. Bide hortan ekimenaren sustatzaileak harremanetan ari dira hainbat musika eskola, dantza eskola eta abarrekin.
Eskola ofiziala bai baina ez Udal-eskola. Finantziaketari dagokionez diru-iturri ezberdinak baliatu nahi baitituzte: enpresak, instituzioak, norbanakoak... “Fundazioaren bidea aukeratu dugu ate guztiak zabalik uzten dizkigun formula delako”.
Fundazioaren bultzatzaileak Santa Luzia Abesbatzeko bost kide izan dira. Oraingoz Arte-Ón zuzentzeko behin-behineko batzorde kudeatzailea eratu dute baina helburua Patronatu bat sortzea da. “Hori eratzeko elkarteekin kontatu nahiko genuke”. Orduan, zuzendaritza berri horrek zehaztuko lituzke lan-ildoak.
Bestetik, fundazioaren izena azaldu nahi izan zuten. Zentzu bikoitza du Arte-Ón-ek. Batetik euskarazko adieratik ulertuta artearen ontasuna adierazi nahi dute. Bestetik, ingelerazko ON hitzaren piztu zentzua ere baliatu nahi dute, aparailu elektrikoen gisan artea ere pizteko.
Abesbatzako kideekin harremanetan jartzeko bideok eskaini zituzten: info@coralsantalucia.com eta www.coralsantalucia.com.