Eskualdean funtsezkoa den Luiaondoko geltokiaren irisgarritasuna eta segurtasuna hobetzea etengabeko kezka izan da EAJ-PNVrentzat Aiaran, eta gure alderdiak Estatuko Aurrekontu Orokorrak egiteko aurkeztutako zuzenketa bati esker, Garraio Ministerioak enklabe garrantzitsu horretan esku hartzeko bi milioi euroko partida ekonomikoa lortu zen, nasetako irisgarritasuna hobetzeko eta, aldi berean, segurtasuna handitzeko. Hala ere, udal-izapideak arintzea funtsezkoa da izapide horiek gauzatzeko.
Aiarako Udaleko EAJ-PNVren Taldeko bozeramaile Gentza Alamillok azpimarratu duenez, "etengabeko harremanetan egon gara Diputatuen Kongresu eta Senatuko Euskal Taldeko ordezkariekin, gure bizilagunentzako ezinbesteko proiektu honen jarraipena egiteko. Baina tamalgarria da, gure ahaleginak ahalegin, EH-Bilduko udal taldea, orain Alkatetzan dagoena, beharrezko arintasun eta interesik ez erakustea eskatutako izapideetan".
Gainera, Aiarako azken udalbatzarrean, EAJ-PNVk erantzun arin eta eraginkorra eskatu zion gobernu-taldeari, galde-eskeetan premiazko behar horri, egiaztatu baikenuen ADIFek sarrera-erregistro bat egin zuela hilaren hasieratik, Udaletik solaskidetza-lanak egiten zituen pertsona bati buruz galdetuz. Horrek egoera surrealista sortu zuen, Osoko Bilkuran bertan agerian utzi baitzuen egungo agintariak ez zeudela eskaera horren jakinaren gainean. "Luiaondoko geltokia funtsezkoa da gure udalerri eta eskualdearentzat, eta ezinbestekoa da beharrezko neurriak hartzea irisgarritasuna eta instalazio publikoak erabiltzen dituzten herritarren segurtasuna bermatzeko", gaineratu du Alamillok.
Izan ere, 2023ko Aiarako udal-aurrekontuan, EAJ-PNVk partida ekonomiko bat sartu zuen aparkalekua handitzeko proiektua idazteko, baina EH-Bilduko udal-taldeak ez du garatu. Beraz, zoritxarrez, partida hau ez da erabiltzen ari herritarren eskari bati erantzuteko, aurreko alkate jeltzaleak, Gentza Alamillok, proiektatu zuen bezala.
Horregatik guztiagatik, "Aiarako EAJ-PNVtik, gobernu taldeari eta EH-Bilduko alkateari zehazki, eskatzen diogu ADIFen esku jar dadila eta Luiaondoko geltokian hobekuntzak egiteko beharrezko izapideak arin ditzala, horrela, aiaratarren eskaerak eta itxaropenak betez".