Laudio. 2019-04-30. Proposamen berri hau premiazkoak, geroratu daitezkeen eta ezinbestekoak diren diru partiden aurrekontu-azterketaren emaitza da, osasun-krisiak gure jendarteaneragindako kalteei lehentasunez aurre egiteko; Laudio Udalarentzat ekonomikoki bideragarria den proposamena da.
Gizarte-zerbitzuekin lotuta, EH Bilduk adineko pertsonei eta familiei diru-laguntza baten bidez laguntzeko aukera planteatu du, koronabirusaren alarma-egoeraren ondoriozko beharrei eta galerei erantzuteko. Adibidez, laguntzak eskainiko lirateke 0 eta 12 urte bitarteko haurrak edo mendeko pertsonak zaintzeak eragindako ahalegin ekonomikoak arintzeko, edo soldatarik gabeko baimen-eskaerek eragindako kalte ekonomikoak konpentsatzeko. EH Bilduk laguntzak ere proposatu ditu diru-sarrerak gutxitu zaizkien familientzat, apirileko eta maiatzeko alokairua edo mailegua ordaintzeko. Azkenik, oinarrizko beharrak betetzeko laguntzak ere aurreikusten dira, hala nola elikagaiak, osasun eta farmazia-produktuak , ura, gasa, elektrizitatea eta abar erosi edo ordaintzeko.
Era berean, EH Bildu Laudiok ezinbestekotzat jotzen du gizarte-larrialdietarako laguntzak aurreratzea, eta diru-partida hori %25 handitzea; paperean behar duten familia guztiei eskola-materiala etxean izateko aukera bermatzea; udal baratze ekologikoetan txanda, denbora zein erabilerarako prebentzio-neurriak hartzea …
Bestalde, mugikortasunaren arloan agertzen diren erronka berrien aurrean, garraio-modalitate gisa bizikletaren erabilera bultzatzeko neurriak ezarri behar dira, jendartearen urruntze neurria errazten duen garraio-bide gisa.
Politika fiskalari dagokionez, EH Bilduk proposatu du udal kirol eta kultur zerbitzuen tasak ez kobratzea, edo eman gabeko zerbitzuaren zati proportzionalean ordaintzea. Ostalaritzaren sektorerako erraztasunak ere proposatu ditu, besteen artean 2020ko ekitaldiko terrazen tasa ez kobratzea.
Azkenik, garapen ekonomikoaren arloan, EH Bildu Laudiok proposatu du dagoeneko finkatuta dauden kultur jarduerei eustea, online bidez, tokiko artistek garatutako ekitaldi berriak kontratatzea ere planteatuz, ondoren udalaren webgunearen bidez emititzeko.
Bestalde, tokiko ekoizleei laguntzen jarraituko litzateke, soberakinekin baliabide gutxien dituzten familiei laguntzeko.
Azkenik, establezimendu txikiei, baserritarrei, ostalaritzari, jatetxeei, mikroenpresei eta autonomoei dagokienez, 800.000 euro arteko diru-laguntzak eskainiko dira jarduera uzteak eragindako kalteak arintzeko.
Halaber, EH Bilduk proposatu du 8.000 taloitegi solidario martxan jartzea tokiko merkataritzan eta ostalaritzan erosketa bultzatzeko. 800.000 euro bideratuko lirateke neurri honetara; Udalak 600.000 euroko diru-laguntza emango luke, hau da, neurriaren %75a. Ekimen hau denda guztietara zabalduko litzateke, taberna, jatetxe eta baserritarretara barne, eta herritarren parte-hartzea eskatzen du. 20 euroko bonu bakoitzeko udalak 15 euroko diru-laguntza emango luke eta bizilagun bakoitzak 5 euro.
Osasun krisi hau amaitzean, EH Bilduk kalean asteburu ludiko batzuk antolatzea proposatu du, herriko eragile guztiek egindako ahalegina eskertzeko, eta horretarako, parte hartze zuzena izateko.