Gure udalerriko sanrokeak amaitu zirenetik igarotako denborak ematen digun perspektiba baliatuta, baita herriko beste auzoetako jaien zikloa bukatuta ere, Laudioko EH Bildutik jaien antolakuntzan parte hartu duten kultura-, kirol- eta jai-talde guztiek, zein era pertsonalean inplikatu diren pertsonek egindako lana balorean jarri nahi dugu.
Gure ikuspuntutik jai eredu honek, non antolakuntza irekia baita, oso emaitza onak eman ditu; hortaz jai parte-hartzaileak sustatzen jarraitu behar dugu, eta ez bakarrik sanrokeetan baizik eta udalerriko beste herrijaietan ere: Gardea, Ugarte, Areta, Latiorro, San Joan Astobitza, eta abarretan.
Nahiz eta kontziente izan jaietako hainbat alorretan hobetzeko marjina edo tartea badugula, ideia berriekin aurrea goaz. Aurten esaterako, gure jaien euskal izaera berreskuratzeko eta emakumeen presentzia handitzeko erronka jarri dira mahai gainean. Musika, dantza eta ohiturak plazaratu eta lehenesteaz gain, gure hizkuntza eta aniztasuna erdigunean jarri nahi izan dira; kultura eta sentsibilitate ezberdinen ortzadarra zabaldu nahian. Denon artean guztiontzat izango diren jaiak eraikitzen ari gara. EH Bildutik erronka hauek garatzen jarraitzeko hautua egiten dugu, bai udalean gobernu taldeak egin dezakeen lan guztiaz eta noski, udaletik kanpo EH Bilduko mahai politikoko kideok egin dezakegunaz. Era berean, herriko eragileak eta herritarrak gonbidatzen ditugu bide hau batera jorratzera eta horretarako antolatzen diren jai batzordeetako bileretan parte hartzera.
Euskal Herria Bilduren erronka nagusienetako bat, jaiak ahalik eta parte hartzaileen izatea da, beraz udal taldeak horretarako egiten duen esfortzua aipatu nahi dugu. Aipamen berezia egin nahiko genioke, odoloste eguneko gauean Txosnagunean gertatu zenari. Oso larria iruditzen zaigu eraso sexista baten aurkako aldarrikapen baten aurrean eman zen erantzun bortitza eta erasotzailea. EH Bildutik horrelako jarrerak ez ditugu onartuko.
Bestalde, bestelako zailtasun edo oztopo batzuei aurre egiteko proposamenak mahai gainean jarri beharko genituzke. Diru-laguntzen afera adibidez. Kontziente gara eragileei baliabide honek ematen dizkien erraztasunez, baina baita hauek jasotzeko dauden oztopoez ere. Dirulaguntzak arautzen dituzten legeak, guztion beharrak asetzeko, nola aplikatu ahal ditugun bilatu beharko dugu. Udal prozesuak ezin dira oztopo bat izan, beraz horiek arintzeko ahalegin guztiak egiten jarraituko dugu; herritarrok ahalik eta laguntza gehien izan dezagun.
Edonola ere, jaiak eta herria bizirik daude eta aurrerantzean honela jarraitzeko animo eta bultzada irmoa luzatu nahi dizuegu guztiei. Guk kaletik zein udaletik jai euskaldun, parekide eta herrikoien alde lanean jarraituko dugu. Euskal jaian ikusiko dugu elkar.
GORA JAI HERRIKOIAK! GORA LAUDIO!