EH Bildu Orozkoren iritzia 2022ko aurrekontuen inguruan

Erabiltzailearen aurpegia

EH Bildu Orozkotik gure kezka adierazi nahi dugu Udal Gobernuak erakusten duen jarrerarekiko. Izan ere, herritarrak eta oposizioa entzun gabe, proiektuak aurrera eramateko gaitasunik gabe eta informazioa eman gabe, Adieren gobernantza autoritarioa, gaitasun eta eraginkortasun falta eta gardentasunik eza agerian geratu dira.

Legegintzaldia hasi zenetik hirugarren urtez, 2022ko udal-aurrekontuak oposizioaren eta herritarren proposamenik jaso gabe onartu dira. Orozkoarrak entzun gabe eta proposamen beharrezko eta errealistei entzungor eginez, Adiek gobernantza erabat autoritarioa erakusten du. Lehen sektorea eta tokiko merkataritza sustatzeko eta Orozkoko hainbat azpiegitura hobetzeko EH Bilduk aurkeztutako proposamenetatik bat ere ez da kontuan hartu. Eta herritarren proposamenen inguruan galdetu dugunean, ez dira gai izan zein proiektu gauzatuko diren azaltzeko.

2019az geroztik oraindik egin ez diren hainbat inbertsio daude, hala nola, haur-parkeak eta “kolesterolaren ibilbidea” berritzea, autokarabanentzako aparkalekua, harmailen azpiko espazioa egokitzea edo frontoia estaltzea, besteak beste.

Gainera, aurten, Adieren ekimenez, 546.357€-tan baloratuta, hainbat aldaketa onartu dira 2021eko aurrekontuetan: 468.500€ gerakinetik eta 77.857€ partidaz partida mugituz. Diru hau azpiegiturak eta landa-bideak konpontzeko eta kontserbatzeko, haur-parkeetako obretarako, ibilgailu elektrikoetarako karga-eremurako, larre-planerako, gizarte-etxeko altzarietarako, museoko informatika-aplikazioetarako, ikastetxe publikoko aldageletarako, kirol-instalazioetako makineriarako, iraunkortasun energetikoaren zaharberritze-lanetarako mugitu da.

EH Bilduk, azken osoko bilkuran, inbertsio horiek egin diren galdetu du, eta alkateak uko egin dio erantzuteari. Informazioa ezkutatzea gardentasun falta larria da. Gaur-gaurkoz, ez dago informaziorik gai horri buruz, edo dagoena ez da ezagutarazi nahi. Gure ustez, proiektu horiek ez dira egin. Guretzat oso garrantzitsua da esaten dena egitea eta egiten dena esatea.

Lehen sektoreari dagokionez, ez dago inolako planteamendurik, eta martxotik ez da aurrerapausorik eman larre publikoen ordenantza berritzeko. Tokiko merkataritzari dagokionez, oraindik ez da martxan jarri duela ia bi urte proposatutako bonu kanpaina. Udal Gobernuak uko egiten dio hirigintza arloko proposamenak jasotzeari, eta herritarren eskaera historikoak kontuan hartzeko borondaterik ez duela erakusten du.

Guztiz ulertezina egiten zaigu Adieko Udal Gobernuaren jarrera, proposamenak baztertuz, aipatutako arloetan ezer eskaini gabe. Agerian geratzen dira Adieko gobernuaren paralisia, udal-kudeaketan dauden gabeziak eta orokorrean edozein proposamen aurrera eramateko gaitasun falta.

Adieko udal-gobernuari eskatzen diogu gardentasunez joka dezala, eta azal dezala 2021eko uztailean eta urrian onartutako 546.357€-tan baloratutako aurrekontuen aldaketetatik zer inbertsio egin diren, eta koherentea eta gardena izan dadila 2022rako onartutako aurrekontuekin.

Aurrekontuak ez daude Orozkoko beharretara egokituta, ez dira adostasunez egin eta ez dira jaso 2019az geroztik egiteke dauden hainbat inbertsio. Hala ere, positibotzat jotzen dugu euskararen normalizaziora eta gazteria arlora bideratutako partidak handitu edota Hiltegia Ez Itxi Plataformak eskatu bezala, Laudioko hiltegiaren itxierak sortutako egoerari aurre egiteko partida bat sortu izana.

Azaldutako guztiagatik, EH Bilduko Udal Talde Politikoak ez du babestu 2022rako udal aurrekontuen Adieren proposamenaren onarpena, eta abstenitu egin gara.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide