Azken urtea legegintzaldi barri batek eta ziklo aldaketa batek markatutako urtea izan da. EH Bilduk emaitza historikoak lortu dauz Orozkon azken bi hitzordu elektoraletan eta Udalean gure ordezkaritza bikoiztu dogu. Horrek indar handiagoa emoten digu orozkoarren alde lanean jarraituteko eta gure herriak behar eta merezi dabezen erantzunak emoteko.
Orain arte ezinezkoa zana posible egiteko aukerak ikusten doguz eta EH Bilduko zinegotziok gure onena emoteko prest gauz Udaleko ateak ireki eta herritar guztien ahotsa aituteko. Gure ardura ere bada herritarren nahiak, herritarren beharrak, herritarren ezinegonak eta herritarren desirak zeintzuk direzen jaso eta hori politika publikoetan errealidade bilakatzea.
Trantsizio energetikoaren arloan hasitako bideari jarraipena emoteko konpromisoagaz helduko diogu urte barriari, udal eraikinetan eguzki plakak jartzeko proposamena martxan jarri eta komunitate energetikoak sustatzeko proiektu bat gauzatuz. Bestalde, tokiko merkataritza sustatzeko, lehen sektorean belaunaldi aldaketa posible egiteko, euskararen normalizazinoaren alde urratsak emoten jarraituteko edota bardintasun arloa indartzeko proposamenetan lanean gabiz.
Aurten hasi dogun legegintzaldi hau orozkoarren alde lan egiteko aukeraz beteta ikusten dogu eta oraindik egiteke dauzen EH Bilduk proposatutako hainbat proiektu martxan jarri eta beste hainbat gauzatu daitezen bermatzeko konpromisoa dekogu.