Gardea-Laudioko Ibaigotxaga (‘Igosaga’) baserrian jaio zen Saturnino de Acha y Ayala, 1851. urtean, Josef María de Acha y Mendivil eta María Josefa de Ayala y del Corral-Velascok osatutako sendian, haren zazpi seme-alaben artean bigarrena izanda.
Hirugarren Guda Karlistaren ostean Ameriketara joan zen XIX. mendeko 80. hamarkadaren inguruan —lehendik bertan finkatutako laudioar baten deiari kasu eginez, agian—. 1882. urtean Mexikoko Veracruz-etik Kubako La Habanara igaro zela badakigu, «Alfonso XII» ontzian. 1886ko uztailean Bilbon zegoen, non Josefa Bastida y Barrenechea andrearekin ezkondu zen; hilabete batzuk geroago Santanderretik Veracruz-era ontziratu zen berriz, emaztearekin, Compañía Trasatlántica Española zeritzonaren «Ciudad de Cádiz» ontzian.
Bidaian Higinio de Acha y Luja 12 urteko iloba zena ere egon zen. Saturnino Mexiko D. F.n finkatu eta merkatari gisa arituko zen. Goian ikusi daitekeen eskuz idatzitako zigilodun gutunean Jerez-ko «Gutiérrez Hnos.» cadiztar ardo, pattar eta likore-inportatzailekin gauzatutako harreman ekonomikoak irudikatzen dira. 1900. urtean Ruperto de Acha y Luja (Laudio, 1887) iloba gazteari deitu zion, haiekin Mexikora joan zedin. 1887 eta 1905. urteen artean Mexikon jaiotako zenbait seme-alaben aita, 1909an Laudion topatzen dugu Josefa andrearekin, Francisco Acha Pinedo —bere anaiaren biloba— zenaren aitabitxi gisa. Garai hartan Bilbon bizi zela jasota dago.