Urtarrila beroa Tubos Reunidos enpresaren Amurrioko lantegian. 3 sute 12 egunen buruan; langile zaurituak, ebakuazioak, tresneria hondatua eta nabe suntsitua, ekoizpenaren etenaldi eta lekualdatzeak, isurketak eta ke-lainoak ondorio gisa. Azken hauek, beste batzuen artean, enpresaren galeren azpian ezkutaturik geratuko dira komunikabide handietan, enpresa handien eragina nabarmenagoa baita enpresa handi diren talde mediatiko handiengan (nahiz eta benetan ez dituen enpresak ordainduko, langileek eta gizarte osoak baino, bai dirutan baita ondoriotan ere).
Salaketa batek sugarren artean sartzea lortu du, LAB sindikatuak jarritakoa alegia, segurtasun neurriak bete ez zirela argudiatuta. Jasotako informazioarengatik, atera daitezkeen ondorioak ez dabiltza horrengandik urrun, ez baitirudi normala lau egunetik behin sutea egotea hilabete erdian zehar, bereziki arriskutsuak diren operazioetan ikuskatzaileek konoetan ura egonda onarpena ematea edota ustez mantentze eguneratua jasotzen duten tresnek bat-batean su hartzea. Nork itzaliko ote du langileriak eta gizarteak jasango duen sutea?