Pasa den astean SAIA baimenak jasotzen dituen ikerketa sismikoak bukatu ziren Aiaraldean. Astearte gauean, ordu txikitan, kamioi bibragailuek bere lana amaitutzat eman zuten eskualdean eta langileek kableak zein geofonoak eraman zituzten.
Asteazkenean bertan manifestazio batek Luiaondo eta Laudio lotu zuen eta 300 pertsona inguruk parte hartu zuten mobilizazioan ikerketen emaitzak gero ez ohiko gasa ustiatzeko balio dezaketela salatzeko.
EVEk eta Fracking-aren aurkariek prentsa oharra argitaratu dituzte
Hala ere, SAIA baimenaren inguruko tira-birak ez dira guztiz amaitu. Alde batetik, EVEk oharra argitaratu du bere web-atarian salatzeko Orozkon zein beste lekutan sabotajeak jasan dituela ikerketa sismikoak egiten dituen enpresak. Sabotajeek eragindako kalteak 170.000 eurotan baloratu ditu erakunde publikoak. Aldi berean, azpimarratu du SAIA baimenaren helburua gas konbentzionala esplotatzea dela.
Bestalde, oharra plazaratu zen egun berean, eztabaida gauzatu behar zen Orozkon SAIA baimenaren inguruan. Mahai-ingurua udalak antolatu zuen eta SHESAk -SAIA baimena jaso duen EVEko enpresak-, Fracking Ez Arabak eta Fracking Ez Aiaraldeak parte hartuko zutela iragarri zen. Ostegunean, SHESAk adierazi zion Udalari ez zuela parte hartuko.
Fracking-aren aurkariek Orozkora hurbildu ziren ekimenean parte hartzeko eta oharra zabaldu dute gero: "kale egin ondoren, herritarrek zituzten kezka gehienak erantzunik gabe geratu dira, eta ezin izan dute jakin, adibidez, gaur egun objektibo konbentzionalen gerizpean lortzen ari diren informazioa etorkizun hurbilean gas ez konbentzionala haustura bitartez ateratzeko ez ote duen balioko, edo zerikusirik baduen SAIA baimenak gas ez konbentzionalarekin, kontutan izanik bai Hego, Ekialde edo Mendebaldetik SAIArekin muga duten beste hainbat baimenetako helburua gasa frackingaren bitartez ateratzea dela."
Ekintza gehiago
Fracking Ez Aiaraldeak iniziatiba gehiago antolatu ditu. Gaur bertan bideo emanaldia egingo dute, 19:00etan Kultura Etxeko 30. gelan. "Gasland" dokumentala jarriko dute Fracking-aren eraginak zabaltzeko.
Larunbatean Ugaon 12:30ean egingo den manifestaziora joateko eskualdeko plataformak bizikleta ibilaldia egingo du. 11:00etan Laudioko Plazatik abiatuko dira txirrindulariak, ordu laurden geroago Aretako Kultur Etxetik igaroko dira eta 11:45ean Arrankudiaga-Zolloko Udaletxean dagoen jendea jasotzea espero dute.