Internet eguna ospatuko da bihar Euskal Herriko hainbat herritan Eusko Jaurlaritzaren, SPRIren, KZgunearen eta Internet&Euskadi elkartearen ekimenez. "Internet Eguna. Konekta zaitez. Bizitza erraztuko dizu" lelopean, hamaika ekitaldi aurreikusi dira larunbaterako. Laudion zehazki, "gazte eta helduentzako geolokalizaio jardunaldia" egingo da eta hiru ekimen izango dira aukeran.
Alde batetik 8 urtetik gorako gazteei zuzendutako "Geocaching: GPS bidezko bilaketak" jolasa Aldai plazan izango da, GPS hargailu batekin "altxorrak" bilatu beharko dituzte bertaratutakoek. Bigarren ekimena 18 urtetik gorako gazteei zuzendua egongo da, "Laudio Coaching" titulupean nork bere gailuen bitartez (GPSak, smarthphonak...) eta koordenatuak emanda, Laudion sakabanatutako objektuak bilatu beharko dituzte parte hartzaileek. Ekimen hau ere Aldai plazan izango da.
Azkenik, eta eguna bukatzeko, hitzaldia eskainiko da Goikogane mendi taldearen egoitzan (Araba kalea 2) "Internet eta GPSa kanpoan eta outdoor egiten diren jardueretarako" izenburupean.
Internet eguna dela eta Laudion antolatutako ekitaldi guztiak doakoak izango dira, baina hitzaldiaren kasuan beharrezkoa izango da aldez aurretik antolatzaileen web gunean izena ematea. Informazio gehiago hemen.