Urduñako Udalak eta web-gune hau kudeatzen duen Aiaraldea Komunikazio Leihoak sakelako telefonoetan Otxomaioetako egitaraua ikusi eta deskargatzeko aplikazioa garatu dute elkarlanean. Egunez egun egitaraua kontsultatu eta norberak zein ekitalditan parte hartuko duen markatzeko aukera ematen du apikazioak, agenda pertsonala osatzeko aukera eskainiz.
Bi modu daude aplikazioa erabiltzeko; lerroan internetera konektaturik kontsultatzea, edo eta Android sistema eragilea duten gailuen kasuan, aplikazioa deskargatzea eta sareko konexiorik gabe kontsultatzea.
Aplikazioaren zabalpenerako QR kodeak erabili dira, sakelakoarekin kodea eskaneatu eta aplikazioa deskargatu edo kontsultatzeko aukerara eramaten gaituztenak.
QR kodeak, bi dimentsiotako barra kodeak
Wikipediak azaltzen duenez, QR kodea (ingelesetik: Quick Response Barcode) Denso-Wase konpoinia japoniarrak 1994an sortutako bi dimentsiotako barra-kodea da. Kode honek datuen matrize baten itxura dauka, koadro formako eredu batean atzeko planoa kolore zuriz eta gainean kokatutako koadrotxoak beltzez agertzen direlarik. Kode hauetan edozein informazio gorde daiteke, baina gehien bat URLak edo testua gordetzeko erabiltzen dira. Izkinetan hiru lauki handi ditu, irakurgailuek kodearen kokapena antzematea ahalbidetzeko.