ADAM proiektuak arte eszenikoen gunea bihurtu nahi du Zuhatzako Enegorta dorretxea

Bi urtetako lanaren ondoren, bihar Azaroak 5 eguerdiko 12tan aurkeztuko dute jendaurrean kultur munduko hainbat profesionalek sustatutako ADAM proiektua. Ekitaldia Aiarako erabilera anitzeko gelan izango da, eta antolatzaileek Aiaraldeko gizarte eragileak eta norbanakoak gonbidatu dituzte ekitaldi honetara "ADAM proiektuak eskualdeko eskaintza kulturala astindu eta eragiteko duen helburua" gizarteratzeko.
Eragile ezberdinei luzatutako gonbidapenean azaltzen dutenez, "proiektuaren egoitza soziala Zuatzako Enegorta dorretxea izango da, eta bertan arte eszenikoen esparruko hainbat jarduera" sustatuko dituzte, besteak beste "antzerki ikuskizunak, txotxongiloak, dantza, literatura emanalidak, erakusketak..."
Proiektu honen sustatzaileetako bat antzerki independentean eta telebista kate bateko telesail ezagun batean lan egin duen  Zutoia Alarcia aktore laudioarra da. Zutoiak azaldu digunez, arte eszenikoen arloan urteetan lan egitera kanpora joan behar izan diren hainbat profesionalek sustatu dute ADAM proiektua, "elkar asko maite dugun eta senidetza loturak ditugun hainbat profesionalek". Egitasmo honen arrazoiez galdetuta, kanpoan ez ezik, "arlo honetan formakuntza profesional eta amateurra jasotzeko aukera Euskadin bertan izatea" da. "Lan egiteko kanpora joan behar izateaz gogaituta gaude, etengabe bidaiatu behar izateaz... etxera itzultzeko modu bat da hau, bai eta kanpoan, Madrilen eta Bartzelonan jasotako esperientzia eta ezagupenak gure herrian baliatzeko ere" azaldu digu Zutoiak.
Proiektua Aiaran kokatzeko arrazoia "lurralde honekiko dugun maitasuna" dela azaldu digu gaur egun Izorian bizi den aktore laudioarrak.
Alokairuan hartu duten Enegorta dorretxea bi urtetan txukuntzen aritu dira ADAM proiektuaren sustatzaileak, eta "nahiz eta euren beharren arabera eraikina moldatzeko lege arazo batzuekin" topatu diren, "proiektua bertan mantentzearen aldeko lana egingo dugu lurralde honek merezi duela pentsatzen dugulako".