Udaletxean bertan EAJko udal taldea osatzen duten sei zinegotzietatik bostek eskainitako prentsaurrean Laudioko EAJk Bildu koalizioko Gobernu Taldeari elkarlanean aritzeko 8 puntu zehatz eskaini dizkio. Mikel Lasak adierazitakoaren arabera, “proposamen hau Laudioren alde lan egin nahi dugula erakusteko modua da”. Era berean adierazi du eurena ez dela “ezezko itxiaren jarrera”, baizik eta “herriaren alde lan egitekoa, gobernu taldeak lan egin eta proposamenak egin ditzan laguntzea”.
Laudioko EAJk egindako proposamenetako bat, “Udalerako konfiantzazko langileak lehiaketa publikoaren bitartez kontratatzea” da, baina zehaztu dutenez, langile horien kontratazioak “profil tekniko- profesionalari” erantzun behar dio eta ez “profil alderdikoiari”.
Aurrekontu “orekatuak” egiteko proposamena ere mahaigaineratu du alderdi jeltzaleak, eta “zorpetzea aparteko egoetarako baliabide bakarrik izan dadila” eskatu du. HAPOa ere (Hiri Antolamendurako Plangintza Orokorra) gogoan hartu dute 8 puntuko euren proposamenean; “EAJ-PNVk Hiri antolamendurako plan nagusiaren berraztertze lanak berehala berrartzea eskatzen dio Bilduk osatzen duen gobernu taldeari”.
Era berean lana eta formakuntzaren esparruan “enplegu eta formakuntza berariazko planak garatzea eta egikaritzea” proposatu dute, “beti ere udal eskuduntzaren eremuan- eta LHUIarekin eta Tokiko Garapen Agentziarekin elkarlanean”.
Lamuza parkearen “jarduera plan bereziaren garatzea eta egikaritzean” ere elkarlanerako jarrera agertu dute prentsa agerraldian, bai eta Abasto Plaza “eraberritzeko proiektua Laudioko merkatarien parte-hartzearekin egin dadila” proposatu ere.
Etxebizitza eta hirigintzaren arloko beste bi proposamen azaldu dituzte ordezkari jeltzaleek; batetik “sustapen publikoko etxebizitzen eraikitzeari dagokionean, Goikoplaza plan partzialaren aldez aurretiko egikaritzea has dadila” proposatu dute, eta Ugarteko biribilgunearen auzian “Goienuriko trafiko arazoak behin betirako konpontzeko proiektu hau martxan jar dadila”.
Azkenik “jarduera proposamen hauek gure herriaren garapenerako oinarrizkoak eta funtsezkoak” direla adierazi dute ordezkari jeltzaleek, “baita berehala bete beharrekoak ere”.