Asasam buruko eritasunak dituzten pertsonen eta euren senideen elkarteak Amurrioko beste hiru elkarterekin batera antolatu du Osasun Mentalaren egunaren bueltan kokatzen den martxa hau; Amurrioko patinatzaile elkartearekin, Oinkariak Atletismo klubarekin eta Amurrioko Aisia Eskaut taldearekin hain zuzen ere. Martxa Sozial hau urrriaren 8an izango da eta Amurrioko inguruak zeharkatuko ditu.
Asasam-eko kideen azaldutakoaren arabera, “partaidetza eta jasangarritasuna sustatzeko” jarri dira harremanetan beste hiru talde hauekin, “buruko eritasunaren gaia” ahal beste gizarteratzeko helburuarekin. Horrela, “Osasun Mentalaren aldeko Martxa Sozialean” parte hartzeko deia luzatu dute antolatzaileek, “gure ideiak partekatzen dituzuenei zeuen bizikletan, ibiltzen, patinetan edo higikortasun jasangarria defendatzen duen beste edozein moduan etortzera gonbidatzen zaituztegu”.
Martxa larunbatean, urriak 8, izango da, 4,3 kilometro izango ditu eta 11tan aterako da Juan de Urrutia plazatik. Elizako biribilgunea igaor eta kiroldegira bidean, Abiagako pasealekura aterako da San Jose auzotik Juan de Urrutia plazara itzultzeko gero.
Flores de Papel filma emango dute Artziniegan
Osasun mentalaren eguna dela eta, martxa ez da Asasam elkarteak antolatutako ekimen bakarra. Iaz Luis Vil zinemagile ezagunarekin batera egindako “Flores de Papel” filma Artziniegako Museo Etnografikoan emango baitute urriaren 8an, arratsaldeko 18etan.