Entzutegi Nazionalak ezarritako 4 urteko espetxe kondena azken egunera arte bete ondoren, gaur geratuko da aske Oier Amorrortu euskal preso politiko laudiarra.
2007ko irailaren 19an atxilotu zuen Ertzantzak Laudioko Zubiko kurajo kaleko bere etxean "txikizio terroristak ahaleginaren mailan" egotzita, laudioarrak 29 urte zituen orduan. Bi egunez polizia autonomikoaren eskuetan inkomunikatuta eman ondoren, Entzutegi Nazionaleko Fernando Grande Marlaska epaileak Soto del Real kartzelan espetxeratzeko agindua eman zuen. Zehazki, urte bereko otsailaren 5an Laudioko Vital Kutxaren kutxazain automatikoan eztanda egin ez zuen etxeko lehergailu bat jartzea egotzi zioten laudiarrari, DNA froga oinarri hartuta.
Lau urte hauetan Oier Amorrortuk eta bere senide eta lagunek espetxe-sakabanaketa politikaren ondorioak pairatu behar izan dituzte, eta Soto del Real, Navalcarnero eta Zaragozako Darokako espetxean izan dute preso.
Kondena beteta, laudioarra gaur askatuko dute Darokako espetxean. Senide eta lagunek Oier Amorrorturi ongi-etorria egiteko deialdia luzatu dute, Aretako autopistako peajean arratsaldeko zazpiretan.