ASIER AMONDO GOROSTIZAGA (1969). Urte asko dira egunak AEK-n lanean ematen dituela Asierrek, aurtengo korrikan egindako lan eskerga oraindik ere gogoan, erronka berri bati heldu dio Laudioko beste hainbat eta hainbat eragile eta pertsonekin batera, larunbatean ospatuko den Euskararen Egunari hain zuzen ere.
Orainartean "euskal jaia" izan denak orain euskararen jaia izena hartu du. Zergatik?
Euskal Jaiaren izenaren barruan dena sar daitekeelako eta uste genuen euskara jai honen erdigunea behar duela izan, eta euskara erdigunea izan zedin izenetik beretik etorri behar zuen aldaketa. Euskara erdigunea behar du izan larunbatean eta hori guztia urteko gainontzeko 364 egunetara zabaldu behar da.
Zer garrantzi hartuko du euskarak eta bere erabilerak jai honetan?
Esan dudan bezala euskarak zentroa behar du izan euskararen erabilera funtsezkoa izan behar du jai honek zentzua izango badu.
Aurtengo jaiaren antolaketa-eredua aldatu egin da? Zeinek parte hartuko du aurten?
Eredua aldatu egin da herri eragileak eta udala elkarlanean aritu izan gara hau guztia abian jartzeko. Parte hartzearen gainean esan parte hartze zabala egon dela bai egindako bileretan bai egunean bertan parte hartuko dutenen artean.
Iaz egun honen bueltan sortutako ikamikak gainditu al dira?
Bai, gainditu egin dira ikamikak, gainera, nire uste apalean iazkoa batez ere komunikazio arazo baten ondorioz sortu zen, zorionez aurten gainditu duguna.
Alkatearen ausazko hautaketa 1.341. urtean egin omen zen lehenengo aldiz, aurten nola egingo da?
Aurten egin nahi duguna berritzailea izan nahi du eskualde izaera eman nahi diogu baina egunean bertan ikusiko dugu arrakastarik izan dugun edo ez.
Zein egitarau prestatu duzue larunbatera begira?
Egitarauan ez da berrikuntza handirik antzematen; dantza plaza, bazkaria, Alkatearen aukeraketa, umeentzako herri kirolak, erromeria, kantak, apur bat denetarik aipatu beharrekoa da bazkarian bertsolariak izango ditugula eta nortzuk eta Maialen Lujanbio eta Andoni Egaña.
Aurtengo kartelak zeresanik eman du...
Ez dakit zer esanik eman duen, dakidana da, jendearen gustokoa izan dela
Jai honetan parte hartzeko zalantzan dagoenari zer esango zenioke?
Zalantzarik ez izateko, parte har dezan era batean edo bestean baina hori bai EUSKARAZ Euskararen benetako Jaia izan dadin eta urteko gainontzeko egunetan ere jai honetan bizi gaitezen.