75 urte zituela zendu da Laudioko militante abertzale eta herriko historiaren zein hizkuntzaren aztertzaile sutsua. Ikasketaz ingeniari industriala eta euskal filologoa zen Gentza Belaustegigoitia, urte luzetan Aceralia izandakoaren Basauriko Etxebarriko lantegiko zuzendaritzako kidea. Politikan EAJ alderdian aritu zen, harik eta alderdi jeltzalea zatitu eta Eusko Alkartasuna sortu zen arte.
Hainbat eta hainbat kargu politikotan aritu izan da Gentza Belaustegigoitia; Arabako Diputatu Nagusi, Garaikoetxearen lehen gobernuko Lehendakaritzako Idazkari, Arabako biltzarkide, eta Laudioko Udaleko zinegotzi 1995 urtetik 1998ra. Adinak eta osasunak bere jarduera politikoa zaildu bazuten ere, azkenengo urte hauetan ere, Eusko Alkartasunako zerrendetan parte hartu izan du Belaustegigoitiak, azkenengo aldiz 2007ko udal hauteskundeetan. Azken Udal hauteskundeetan Bildu koalizioko zerrendetan joateko nahia adierazi bazuen ere, osasun arazoak direla eta, azkenerako ez zuen zerrenda horretan parte hartu.
Herriko historiaren eta ohiturak ezagutu, aztertu eta zabaltzea maite zuen Gentza Belaustegigoitiak, eta asko dira argitarapen ezberdinetan idatzitako artikuluak, San Roke kofradiaren aldizkarian besteak beste.
Gentza Belaustegigoitiaren aldeko elizkizunak abuztuaren 2an egingo dira. Arratsaldeko seietan Lamuzako San Pedro elizan.