Azken asteotan, lurraren defentsan diharduten zenbait talde biltzen hasi dira, "Nerbioigoiena pairatzen ari den hondamenari kolektiboki aurre egiteko beharrak bultzatuta". Koordinakunde honetako kideek adierazi dutenez, "bi oinarri basiko eta komunengatik bat egiten" dute bildu diren taldeek; alde batetik "ingurumena erasotzen duten makroproiektuak gelditzeko beharra" eta bestetik "gisa honetako makroproiektuak kokatzen diren herrien erabakitze eskubidearen defentsa eta "Aiaraldea nolakoa izango den erabakitzeko herritar guztion eskubidea defendatzea" ere.
Egungo egoeraren analisi kritikoa egin ondoren, ezkerreko zutabean atxikitutako agiria aurkeztu dute herri eragile hauek, lurralde antolaketaren gaineko oinarriak zeintzuk izan beharko liratekeen islatu nahirik. Manifestuan Ingurumenari dagozkion gai guztietan informazio zehatza eta zorrotza galdegiten dute, bai eta bestelako aldarrikapen batzuk ere;hala nola energia kontsumoa murrizteko planifikazio argia, espekulazio inmobiliarioa errotik mozteko beharra, hondakinen kudeaketa arduratsua, neurrigabeko kontsumoa gelditzeko ezinbestekotasuna, uraren kudeaketa egokia eta nekazaritza zein abelazkuntza tradizionalaren defentsa besteak beste. Manifestuak "kostu ekonomiko, ekologiko eta gizarte kostu izugarria duten makro-azpiegitura eraikuntza lanak" gelditu behar direla ere jasotzen du.
Manifestu hau oinarri hartuta, norbanako zein talde ezberdinen atxikimendua jaso asmo dute datozen hilabeteetan; "erakunde sozio-kulturalak,sindikatuak,alderdi politikoak...". Gaur artean talde hauek bat egin dute manifestuarekin eta bere edukiekin: Sasien Sehaska, Saratxoko Administrazio batzarra, Mendiko Lagunak taldea, Hauspoa, Zanpazu Bizirik taldea eta Jesuri eta ganekogorta Bizirik taldea.