Larunbat honetan Arabar Errioxako Bigarren Raidean parte hartu zuten Ibone eta Aaron Sanchez Garmendia neba-arreba laudioarrek. Korrika egin beharreko 6 km-ko saioarekin hasi zuten parte-hartzaileek eguneko jarduna, eta segidan orientazio akuatikoko saioa izan zuten Oiongo igerilekuetan (igerian joan behar zuten, mapa eskutan, urazpian zeuden balizak topatu ahal izateko). Proba hori bukatutakoan, lehen talde mistoetako lehen posizioan ziren laudioarrak, bukaerararte galdu ez zutena. Ondoren bizikletak hartu eta 18km-ko erronkari aurre egin zioten, 700metroko desnibela gaindituz. Lapoblacion herrira heldu zirenean, 20 minutu inguruko aldea zuten laudioarrek.
Han bizikletak laga eta Leon Dormido mendira (1245m) oinez igo ziren parte-hartzaileak. Ingurutik hainbat baliza topatu behar izan zituzten, 8km eta 600 metroko desnibela gaindituz. Horietako bat eskalada egin ostean bakarrik lortu zitekeen. Trekkingaren ondoren, azken proba gelditzen zen, beste 18km bizikletan, eta Gorrebustotik pasatzean elizaren kanpaidorretik rapela egin zuten.
Irten zirenetik bost ordu eta 15 minutu igarotzean heldu ziren helmugara, bigarren taldeari ordubete luzeko aldea atera ziotelarik.
Bigarren edizio hau oso arrakastatsua izan zen, 45 taldek parte hartu zutelako.