Prentsa ohar baten bidez adierazi dutenez, “Okondoko hainbat herrikidek herri plataforma zabal bat sustatzen ari gara, azken urteotan gure herrian bizi den etengabeko eztabaida eta gatazkaz nekatuta eta klase politikoak gure herriarentzako egiteko egokirik ez dutela sinistuta”.
Plataforma honen sorrerarekin “gure herriaren ziklo bat bukatu” egiten dela adierazi dute, eta era berean “herritarrentzako aukera berri bat” irekitzen dela. “Hurrengo 20 urteetarako Okondo eraikitzeko ordua da” baieztatu dute. “Pertsonalismoei eta protagonismo borrokei lotuta egon da Okondo urte gehiegitan, eta guk ez dugu hori nahi. Okondokoak izatea harro gaude eta ideia berriak ditugunaz ziur gaude, lan egiteko gai den eta lan egiteko prest dagoen jende asko dago”.
Alderdi politikoek Okondoko herriak behar dituen erantzunak emateko ezgauza direla adierazi dute plataforma berriko kideek, “laister zuen botoen eske gerturatuko zaizkizue, nahi duten bakarra horixe da”. Alderdi politikoak positiboan lan egiteko eta akordioak bilatzeko gai ez direla baieztatu dute, “ez dituzte ideia propioak onartzen eta egiten duten gauza bakarra gatazka egoera elikatzea da”. Plataformako kideek “horrekin apurtu” nahi dutela adierazi dute, “eta positiboan lan egin”.
“Herritar arruntak gara, ideia desberdinak ditugun herritarrak, gure kabuz pentsatzen dugunak. Laguntasunak eta lan egiteko gogoak batzen gaitu, konplexu gabe eta etiketa gabe” adierazi dute zabaldutako prentsa oharrean.
Aukeratutako izenaz ere azalpenak eman dituzte “Okondo Bai-k dena esaten du; guztien batuketa, berdinen eta ezberdinen artekoa, eta positiboan”.