2011n, Laudioko Inauteriak ospatzeko egingo diren ekitaldiak antolatzeko ardura bere gain hartuko du Jaiak Koordinakundeak. Hilabete batzuk dira herriko hainbat kultur eta jai-talde biltzen dituen koordinakundea lanean ari dela inauteri jaien antolaketa euren gain hartzeko udalari aurkezteko proposamena lantzen. Galtzagorri kultur taldeak herriko inauteriak antolatzeko ardura utzi zuenetik, udalak enpresa pribatu baten esku utzi izan du lan hau. 2011an ordea, berriro ere, elkarteen eta herrigintzaren eskuetara itzuliko da martxoaren 5etik 8ra Laudio jai eta kolorez jantziko duen festa egunen egitaraua antolatzeko ardura, Koordinakundeak aurkeztutako proposamena onartu baitu Udalak.
Jaiak Koordinakundeko kideek adierazi digutenez, “ospakizunari bultzada berri bat ematea eta ahalik eta elkarte eta pertsona gehienen parte-hartzea eta inplikazioa lortzea dira Jaiak Koordinakundearen helburu nagusiak”.
Martxoaren 5ean dena prest egon dadin buru-belarri ari dira lanean Koordinakundeko kideak; “larunbateko desfile handia eta asteartean Lezeagako sorgina erretzeko egiten den ekitaldia dira Laudioko Inauterien bizkarrezurra, eta bi ardatz horiei indar berria emateko lanean ari gara”. Berrikuntzak ere iragarri dituzte koordinakundeko kideek; “ilusio eta gogo biziz egindako egitarau oparoa prestatzen goazen heinean, laudioar guztiei horren berri emango diegu, hala hedabideen bidez nola ospakizun honetarako propio sortu dugun blogaren bitartez: inauteriak.wordpress.com”.
Herritarrak Inauterietako “protagonista” sentiaraztea dute helburu koordinakundeko kideek, “Inauteriei ere kutsu herrikoi hori eman nahi diegu, elkarte eta norbanakoen inplikazioa lortu eta herritarrak protagonista sentitu daitezela dugu helburu, eta horretarako, Inauteriak baino jai aproposagorik ez da”.
Jaiak Koordinakundeak herriko hainbat elkarte eta jai-talde biltzen ditu, eta jai herrikoi eta parte-hartzaileen alde lan egitea da bere xede nagusia. Zentzu horretan, hainbat dira jai-taldeetako kideek sustatu eta babesten dituzten ekitaldiak, aurki ospatzekoa den Santa Agata, euskararen eguna eta San Pedropeko jaiak besteak beste.
"Neguari agur esan eta lurra loalditik esnarazteko unea da. Kalera atera eta bazterrak kolore eta ilusio berriz janzteko unea. Musika, algara, dantza, magia, tradizioa, zarata, sorginkeria, festa… gurekin mozorrotu nahi duzu?”, horra hor jai herrikoien aldeko Koordinakundearen gonbitea.