Azaroko udalbatzan bozketara eraman zuten aurrerantzean Laudioko kale garbiketa eta hondakinen bilketa arautuko duen ordenantza. ALHAOn (Arabako Lurralde Historikoaren Aldizkari Ofizialean) argitaratu eta hamabost egunetara sartuko da indarrean Ezker Abertzalearen aurkako bozkekin onartutako arautegia.
Atzo egindako ohiko udalbatza saioan EAJ/PNVk eta PPk ordenantzaren aldeko bozka eman zuten, PSE, aldiz, abstenitu egin zen. Ordezkari sozialistak udalbatzan azaldu zuenez, ordenantzaren bozketan abstenitu egin dira "botilatzarra" egiten den guneen garbiketa eta birziklapen esplizitua ez aipatzeagatik.
Ezker Abertzaleak bere aurkako bozkaren zergaitia azaldu du prentsa ohar baten bidez. Salatu dutenez "Ordenantzak indar gehiena isunetan jartzen du, baina ez ditu informazio edo hezkuntza neurriak aurreikusten". Onartu berri den ordenantzak auzokideen betebeharrak ondo definitzen dituela adierazi dute, baina ez Udalarenak. "Adierazpen askatasuna bermatuko duen neurririk ez da hartzen, eta adierazteko eskubidea nork daukan alkatearen esku uzten da kasu askotan, erabilpen politikorako aukera emanez".
Salatu nahi izan dutenez, "herri honetan eskarmentua daukagu gai honekin eta badakigu araudi hauek zelan erabili diren Ezker Abertzalearen aurka eta adierazteko aukera gutxien dutenen aurka".
Araudi berriak, besteak beste, kartel bat jartzeagatik 750 eta 1.500 euroko isuna aurreikusten du, eta bi kartel jartzeagatik 1.500 eta 3000 € artekoa.