Atzo Amurrion egin zen konzentrazioaren kronika bidali digu Koldo Zabalak:
Amurrioko plazan, arratsaldeko 18:00etan 80 lagun inguruk erantzun diote Amurrioko Sahararen Aldeko elkarteak egindako deialdiari. Bertan bildu direnek egunotan Aaiunen(Mendebaldeko Sahara), Gdaim Izik kanpalekuan, Marokoko gobernuak egindako basakeria eta triskantza salatu nahi izan dute.Elkarretaratzean Amurrion bizi den saharar baten esanetan (Mohammed) Saharar herriari pazientzia agortzen ari zaio eta 91ko hitzarmenetik su-etenean sahararrak baino ez daude. Marokoko gobernuak behin eta berriro giza eskubideak zapaldu ditu eta sahararren borrakaldi baketsuak bortizki isildu nahi ditu.
Elkarretaratzea amaitu ostean, antolatzaileek adierazpena irakurri dute euskaraz, gaztelaniaz eta hassanieraz. Bertan jakinarazi dituzte egunotako triskantzaren datuak, 159atxilotu, 700 desagertu eta 19 hildako.
Amurrion bizi den saharar honek egunotan hasitako elkarrizketen inguruan esperantzarik ez duela dio eta Marokoko gobernuak Frantziaren laguntzarekin, Espainar gobernuaren ardurarekin eta Europar Batasunaren utzikeriarekin gatazka hau luzatzeko eta autodeterminazio erreferenduma ez egiteko asmoa du.
Amurrioko Sahararen aldeko elkartetik, larunbatean, Madrilen eguerdiko 12:30etan izango den manifestaziora joateko deia zabaldu dute eta horretarako autobusa irtengo da Laudiotik, Amurriotik eta Urduñatik.