Urriaren 29an hasiko diren Mikologia Topaketetan estatu guztiko parte-hartzaileak espero dituzte Perretxikozaleen Laudio Elkarteko kideek. Elkarte horren 30. urteurrenarekin batera egingo dira aipatu topaketak.
Interneteko foro batean sortu zen topaketa hauek aurten Laudion antolatzeko aukera. Jardunaldien helburua da kultur mikologikoaren inguruan dabiltzan pertsonak elkartu eta euren lana jendartean zabaltzea. 94 pertsonak izena eman dute dagoeneko.
Egitarauari dagokionez, jardunaldiak urriaren 29an hasiko dira parte-hartzaileei harrera eginez, lehen topaketari heltzeko gero; Lamuza parkeko Etxe Nagusian izango da arratsaldeko 19:00etan. 20:00etan aldiz, Cristobal Burgos elkarteko ohorezko kideak Aiara bailarako onddoen inguruko ikus-entzunezkoa eskainiko du.
Biharramunean, larunbatean hain zuzen ere, mendira txangoa egingo dute, aleak jaso eta sailkatzeko gero. Bazkalorduan, elkarteak omenaldia egingo dio Martin Mendoza elkarteko ohorezko bazkideari eta arratsaldeko txandan, berritasun bat dakarte topaketek, batzorde zientifiko batek espezieak azaldu eta aztertzeko lanari helduko baitio jendaurrean. Arratsaldeko 19:30ean izango da hori. Igandean, aldiz, hitzaldia eskainiko dute Lamuza parkeko Etxe Nagusian, 19:30ean.
Azaroaren 1a festa eguna izaki, topaketak kalera aterako dituzte antolatzaileek. Onddoen erakusketaz gozatzeko aukera herriko plazan izango dugu, bai eta ohiko haur-marrazketa lehiaketa eta perretxikoen dastatzea ere.
Bestalde, APILL elkartearekin elkarlanean, “Pintxo eta kazolatxo mikologikoen 1. ibilbidea” antolatu dute asteburu guztian zehar. Herriko taberna eta jatetxeek perretxiko eta onddoen pintxoak prestatuko dituzte eta bezeroek gustokoen izan dutena bozkatuko dute.
Mikologia Topaketa hautan mikolgiari buruzko liburuen erakusketa ere izango dugu, topaketak hasten diren egunetik azaroaren 4ra arte, hain zuzen ere.