2011ko Araba Euskaraz jaia ekainaren 19an Laudion ospatuko dela eta, Juan Karlos Bermejo ikastolako zuzendariak, Mada Lado gurasoen ordezkari eta Laudioko jaietako pregoilari izango denak, eta udaletxeko hainbat agintarik jai honen lehen ekimena izango dena Laudion aurkeztu dute prentsaurrean (duela zenbait egun Gasteizen egin zuten agerraldia).
Laudioko jaietako egun handian, Odolosteen Egunean (abuztuak 28), Araba Euskaraz-eko kamiseta janzteko deialdia luzatu diete herritar guztiei. San Ferminetan zapia txupinazoarekin batera janzten den bezala, laudiorrak "bagare" leloa daraman kamiseta janztera gonbidatu gaituzte antolatzaileek; “euskararekin izan genuen eta dugun konpromisoaren erakusle” adierazi digu Juan Karlos Bermejo ikastolako zuzendariak.
Kamisetak abuztuaren 15etik aurrera jarriko dira salgai, baina antolatzaileek azpimarratu dute “kamiseta ezin dela Odolosteen Egunera arte jantzi”. Azaldu dutenez, denok elkarrekin janzteko arrazoia “egun horretan gure herrian izango diren milaka pertsonei euskararekiko gure konpromisoa argi eta garbi azaltzea” da. Kamisetak saltzeko guneak atonduko dituzte egun hauetan: Andra Marin, San Roken, Gastronomia lehiaketan, Baserritarren Egunean eta Odolosteen Egunean.
Koadriletako ordezkariek, buruhandiek eta dozenaka haurrek bat egin dute Araba Euskarazen lehen ekimen honekin, eta jai giroan Araba Euskaraz festan murgiltzera gonbidatu dituzte herritarrak.
ARGAZKIA bilbuma ikusi nahi baduzu klikatu HEMEN: