Laudioko futbol taldeak pasa den asteleheneko Batzar Orokorrerako aurreikusita zituen puntu guztiak aurrera atera zituen aho batez. 2012-13 denboraldiko balantze ekonomikoa eta hastear dagoenaren aurrekontuaren onespena ziren teorian gai gorienak, bazkideen kuota berriekin batera, baina klubak eta bertaratu ziren 50 bat bazkideek gehiengo zabalez onartu zituzten. Horrela, C. D. Laudiok 705.200 euroko aurrekontua izango du printzipioz 2013-14 denboraldian 2. B mailan jokatzeko, taldearen historian handiena. Ohar bezala, Espainiako Futbol Federazioak ez du oraindik brontzezko kategoriako egutegia kaleratu, eta horrek esan nahi du bidaietarako zuzentzen den aurrekontuaren zatiak aldeketa bat edo beste izan lezakeela egunotan.
Edonola ere, C. D. Laudioko bazkideen kuota berriak web atarian argitaratu ditu taldeak (www.clubdeportivolaudio.net), oinarrian hurrengoak izango direnak (Informazio gehiagorako kontsultatu internet bidezko ataria):
Klubeko bazkideak:
- TRIBUNA: 180 €
- PREFERENTZIA: 160 €
- TRIBUNAKO ERRETIRATUAK (65 URTE EDO+): 110 €
- PREFERENTZIAKO ERRETIRATUAK (65 URTE EDO+): 100 €
- ADINEZ TXIKIKOAK (14-18 URTE): 50 €
Bestalde, Ertzaintzak eta Eusko Jaurlaritzak zenbait neurri berri eskatu dizkiote klubari, tartean segurtasunezkoak, tribunetako eserlekuen zifra gutxitzea kasu. Aurtengo norgehiagoketarako sarrerak, gainera, profesionalen arteko partiduetakoen antzeko itxura izango dute, horrek ekarriko duen gastu extrarekin.
Guzti hau aurrera eramateko klubak Arabako Foru Aldundiaren laguntza ekonomikoa espero du, babesle pribatuenaz aparte. Laudioko Udalak ere egun berean burutu zuen Osoko Bilkuran EAJk aurkeztutako mozioa aurrera atera zuen, zeinetan Udala eta C. D. Laudioren arteko kolaborazio konbenioa eskatu zuten. Proposamenak OMNIA eta PPren aldeko bozkak jaso zituen, PSE-EEren kontrakoa eta Bilduren abstentzioa. Koldo Zabala, Gobernu Taldeko bozeramaileak, argi utzi nahi izan zuen Udaletik ahal beste egingo dutela, baina ezin dutela ezer ziurtatu alor ekonomikoan: “Guztiz prest gaude klubarekin gaur egungo akordioa berrikusteko, baina inolaz ere ez dugu zin egiten taldeak diru gehiago jasoko duenik, baizik eta gaur egun dagoen diru laguntza mantenduko dela”. Izan ere, Bilduk behin baino gehiagotan errepikatu du ez dagoela batere ados Bizkaiko Foru Aldundiak Bilbao Basket saskibaloi taldeari emandako 5.7 milioi euroko laguntzarekin, eta beste maila bateko adibidea izanik, Laudioko kasuak antzeko ñabardurak hartu ez ditzan nahi dute.
Aurredenboraldia abian
Diru kontuak albo batera utzita, C. D. Laudioko lehenengo taldea aurredenboraldiari ekingo dio gaurtik aurrera, arratsaldeko 19:00etan Basarten Amurrio Cluben aurkako partidarekin. Guztira bost norgehiagoka jokatuko ditu taldeak ateari deika dagoen denboraldi itxaropentsuari ofizialki heldu baino lehen, eta hurrengoak izango dira aurrean izango dituen aurkariak:
Asteazkena, uztailak 30 | Basarte (19:00)
AMURRIO - LAUDIO
Larunbata, abuztuak 3 | Ellakuri (19:00)
LAUDIO - MIRANDÉS
Astazkena, abuztuak 7 | Stadium Gal (19:00)
REAL UNIÓN - LAUDIO
Larunbata, abuztuak 10 | Landaberri (19:00)
Garikoitz Esnal XIII Memoriala
ZALLA - LAUDIO
Asteazkena, abuztuak 14 | Vareako munizipala
VAREA - LAUDIO
Larunbata, abuztuak 17 | Ellakuri (18:30)
Fernando Mendia VII Memoriala - XXXV San Roke Txapelketa
LAUDIO - GERNIKA