Urtero bezala, hemen da beste behin Amurrioko Pilotazale Elkartearen eskutik Pilota Txapelketa Soziala. Lehiaketa ostiralean abiatuko da eta maiatza bitartean astebururo partidak egongo dira udal-pilotalekuan.
Guztira Euskal Herri osoko 64 herritako 178 bikote kantxaratuko dira txapela lortze bidean 7 kategoria ezberdinetan: benjaminak, kimuak (alevines), haurrak, gaztetxoak (cadetes), gazteak, seniorrak eta palan ari diren emakumezkoen 21 bikote gaztetxoetan. Hain zuzen ere, txapelketa aurkezteko deitu duten prentsaurrekoan emakumezkoen parte-hartzea azpimarratu nahi izan dute, Amurrioko neskek palan duten maila altuaren harira. Horren isla, Euskal Herriko txapela 5 aldiz irabazi duen Agirre-Landaluze bikotea.
Amurrioko Txapelketa Soziala aurkezteko prentsaurrekoan Fernando Palacios (Arabako Pilota Federazioko lehendakaria), Josune Irabien (Amurrioko Alkatea), Joseba Urieta (Amurrioko Pilotazale Elkarteko lehendakaria) eta Jon Guerrero (zuzendaritza-taldeko kidea) parte hartu izan dute, eta Udalaren babesa eskertu nahi izan dute.
Amurrioko Pilotazale Elkartea erreferentzia da Araban, eta txapelketa hau oso garrantzitsua da Euskal Herri osoan. Esate baterako, egun profesionaletan dabiltzan hiruzpalau pilotari txapelketa honetan lehiatutakoak dira, Apezetxea eta Ezkurdia tartean.
Finalak hurrengo egunetan ospatuko dira:
Maiatzak 3: gaztetxoak, gazteak eta seniorrak.
Ekainak 23: benjaminak, kimuak, haurrak eta emakumezkoak.