Urduñako futbol taldeak mende erdia bete du jada, 1963. urtetik izen hori hartu zuen unetik, hain zuzen ere. Baina bertako futbolak ibilbide askoz luzeagoa dauka, eta “Orduñés” izenpean 1923/24ko Bizkaiko Futbol Federazioko memorian daude hastapenaren arrastoak. Orduko taldeak Bizkaiko gainontzeko herriekiko urruntasuna izan zuen zama pisutsulehiaketa ofizialetan parte hartzeko. Taldekideek ez zuten etsi, eta bere horretan jarraitu zuten haien xedearen lortze bidean.
Horrela, 1949/50 denboraldian, taldea desagertu eta birsortu ondoren, 3. mailako Nerbioi aldeko txapelketan eta Bizkaiko Kopan parte hartu zuen lehenbiziko aldiz. Bertan Laudio, Amurrio, Basauri edo Arrigorriaga bezalako talde askoz trebatuagoak topatu zituen, baina horrek ere ez zuen taldekideen kemena zapuztu.
1963ko irailaren 8an jaio zen C.D. Orduña, eta egun horretatik aurrera beti jokatu du Bizkaiko eskualdeko txapelketetan: 2. erregional, 1. erregional eta Preferente mailen artean. Talde hartako entrenatzailea Alfonso Morán izan zen, eta egungo kolore gorri eta zuriaz gain urdina ere janzten zuten taldearen hastapeneko jokalariek.
Gaur egungo taldeak Urduñako Arbieto Futbol zelaian dauka du egoitza, lehenengo urteetako instalazioekin zerikusirik ez dauka. C.D. Orduñak osasun paregabeaz bizi ditu garai berriak: 500 bazkide, 200 jokalari eta 10 talderekin. Horietatik bi emakumezkoenak dira. Kategoriei dagokionez alebin, kadete, jubenil, absolutu nahiz lehenengo taldeko jokalariak ditu klubak.
50 urteko historia ospatzeko taldeak zenbait hitzaldi antolatu ditu futbolaren inguruan. Besteak beste Carlos Pouso Mirandés-eko entrenatzailea bertan egona da, eta irailaren 8an jaialdi erraldoia egingo dutela aurreratu du. Bertan izango dira mende erdi honetan kluba zuzendu duten presidente guztiak.Jokalari, entrenatzaile nahiz zaletuak bertaratzera deituta daude.