Garrantzi biziko garaipena Sugarrak Laudioko neskek erdietsitakoa, ez hainbeste partiduaren ikusgarritasunagatik, baina ezinbestekoa sailkapenari begira. Senior mailako 2. mailan 5. jardunaldiaren ostean 3-2ko balantzea darama taldeak eta ligako txapelagatik lehiatzera eskubidea ematen duten playoff-etarako sailkatzeko parada daukate oraindik, larunbateko partiduaren ildotik jarraitzen badute, bederen.
Larunbateko norgehiagokari hertsiki helduz, ondorio gutxi atera daitezke talde bisitariak erakutsitako maila eskasa dela eta. Partidu trabatua, grisa izan zen hasieratik bertatik, eta laudioarren presioak, kontraeraso azkarrekin batera, neurketa hasieratik apurtu zuen, lehenengo laurdenetik galduko ez zuten aldea eskuratuz (8. min, 12-3).
Zaila izaten da, ordea, desoreka handiko partiduetan tentsio bera 40 minutuetan zehar mantentzea eta nabaria izan zen taldearen beherakada bigarren laurdenetik aurrera. Kontraerasoak ez ziren behar bezala atera, jaurtiketa errazak ez zuten saskia topatu, eta 3ko marratik kanpoko jaurtiketaz gehiegi baliatu zen taldea. Halere, erreboteen alorrean nagusi agertu ziren Sugarrak-eko neskak, eta horrek partidua erritmo lasaian kontrolatu eta bideratzeko aukera eman zien.
Talde gasteiztarrak, bestalde, ezer gutxi erakutsi zuen kantxan, eta laurden bakoitzeko 3 saskiratze eskas lortuta laster makurtu zuen burua laudioarren aurrean. Nahikari Gardeazabal eta Maider San Martin izan ziren oraingoan norgehiagokako saskiratzaile nagusiak, 10 eta 6 punturekin, hurrenez hurren. Amaieran, istorio gutxiko partidua eta 34-17ko garaipena etxekoentzat.