Orain arte 12 urtetik aurrerako ikasleek inguruko herrietara joan behar izan dute Derrigorrezko Bigarren Hezkuntza egitera; hala nola, Arrigorriagara edo Laudiora. Zeberio eta Arrankudiaga-Zolloko ikasleek ere bertan aritzeko parada daukate.
Eraikin berria dagoen eremuak 5.535 metro karratuko azalera du eta eraikinak berak 4.457 metro karratu ditu, hiru solairutan banatuta (beheko solairua eta bi solairu gehiago).
“Eraikuntza efizientea izango da guztiz. Izan ere, eguzki-panelak (panel fotovoltaikoak) kokatu dituzte sabaian eta horrek elektrizitate nahikoa sorraraziko du institutuaren kontsumorako. Gainera, eraikuntza modernoa da, espazio zabalekin eta oso argitsua”, dio Fernandezek.
Institutuak izango dituen instalazioen artean hauek dira aipagarrienak: gimnasio estalia, alboan behar dituen gelekin (952,11 metro karratu); liburutegia eta erabilera anitzeko gela; kanpoko patio irekia (1.800 metro karratu); jangela; 9 ikasgela arrunt eta 2 banaketa gela; plastika gela; musika, dramatizazio eta audio gela; eta zientzia laborategia.
Gobernu Kontseiluak Hezkuntza, Hizkuntza Politika eta Kultura sailburuaren proposamenez, 4.451.175 euro bideratu ditu obra hauetara.
Proiektua
“Orain dela urte batzuk ohartu ginen Arrigorriagako institutua txiki geratzen zela eta orduan harremanetan jarri ginen Eusko Jaurlaritzaren Hezkuntza Sailarekin, Ugaon Bigarren Hezkuntzako ikastetxea eraiki zitekeelakoan”, dio Ana Maite Fernandez Ugaoko Hezkuntza zinegotziak: “Ikasle ugaotarrentzat izugarrizko abantaila da udalerrian bertan institutua izatea.
Era berean, Zeberioko eta Arrankudiagako ikasleentzat ere hobekuntza izango da, hurbilago izango baitute Bigarren Hezkuntzako eskaintza”.
Ekaitz Mentxaka alkateak adierazi duenez, “zentro berriari esker gure gazteek ez dute beste herrietara joan beharrik izango eta Ugaoko hezkuntza eskaintza oraindik hobea izango da”.