Urteko azkena
GOIKOGANE Mendi Taldeak, egun, urteko azken ibilaldia burutu du, bazkaritan burutu ere. Aurten Arabako Errioxa hartu dugu, ezpel, ezkai, izpiliku, arte, illarra, erromero eta beste hainbat zuhamuxka, basabera edo sastrakaz bete-beteriko beresi eta sasitza malkarretan gora eta behera ibiliz atzenengo ibilaldia egiteko gunetzat. Urtealdia bukatzeko erarik onena oturuntza oparoa izan ohi dugu euskaldunek eta honela egin dugu.
Hurrengo urtean, ohi legez, hainbat txango egingo dugu, eta honetarako egutegia atontzen dihardugu. Urtarrilerako, okerrik ezean, mendizale guztien esku izango den egutegian ibilaldi ororen nondik-norakoak azalduko ditugu. Euskal Herri osoan zehar ibiliko gara – asteburu bat Zuberoan, beste bat Nafarroako Zaraitzu haranean, Tolosako inauterietan, Trebiñu aldean...– eta Espainia aldera ere, inoiz edo behin, joanen gara – Pirinioetara hain zuzen – bai gure aberria bai atzerria ezagutu nahi dugula eta. Ibilaldi guztiotan, esan bage doa, bazkide izan nahiz ez izan, orok esku har dezake.
Garaiotan, bestalde, federatu nahi dutenek eta bazkidetu nahi dutenek, eta hurrengo urteko aseguru-zerbitzuak jaso nahi dituztenek, gure bulegoan, egin behar den guztia egiteko aukera dute, urtearen hasieran dena behar dena legez edukitzeko.
GOIKOGANE Mendi Taldeak, bestalde, etorkizunari begira gai garrantzizkoak erabaki behar ditu eta ezohiko batzar orokor batera etor daitezen bazkide guztiei dei egiten die.