LAUDIOKO IBILALDIA
Atzo, laino zikina gainean genuela, Laudio Ibarrako ibilaldi neurtua egin zen. Ibilaldia zinez ederra: hasi Aldai plazan eta Alpitxu edo Albitzu mendira igo, Otsartetako lepoan Arrankidagako lurretan zehar Pagobakar esaten dioten lekura jo genuen, aspaldiko pago bakar hura erabat ihartua, enbor hila baino ez den lekutik duela ez aspaldiko aterpetxe eder bat eraiki duten Madalena daritzon zelaittora iristeko; Goikoganera igo eta Kamarakan zehar Aretxigarretik Gazteluzar aldera, bertan hornitzeko lekua eta aurrera egiteko behar zen urdai apur bat janda, Ganekogortarantz gogo onez 'abiatu' ginen; tontorrera igaiteko mendia Enkarterri aldetik inguratu genuen, eta azken aldatsa Alontsotegiko lurretan gaindi burutu genuen; jaitsiera, berriz, Arrabatxutik beheti, Kurtziagara, Asuntza aldetik, Okondoko lurretan zehar beraz, Askango bidetik, Garbeko haitza albo batean utzita, Azpurugorta alderaino heldu eta bertatik Larrenekora; Ermuko iturri berrian egarria berdindu eta gero, Isusin Andiko etxe ondotik Iñarrondo arru edo mendarte sakonean barrena Errekabietara jaitsi ginen, mailaz maila eskaileretan beheti. Bazkalordurako denak etxean.
Mendizalerik asko ez zen hurbildu, euri ziri euri miri ziñotsolako kikildurik edo, baina ibili ginenok, behintzat, igande eguarte ederraz gozatu genuen, maite baititugu maite gure bazterrak lanbroak ezkutatzen dizkigunean; eta udazken koloretan apaindurik badagoz, gure basoak, landak...are maiteago.