PICO DEL CARLISTA (KARRANTZA)
Hurrengo otsailaren 28an, GOIKOGANE eta MENDIKO LAGUNAK taldeak, ohi bezala elkarrekin, Karrantzan dagoen PICO DEL CARLISTA izeneko mendira igaiteko asmoz, txango joanen dira. Zeharkaldi ez oso luzea -7,2 km- eta bazkalordurako etxean. Igoeran, berriz, gure oinen azpian zer dugun jakinik, ez da makala gure ibilaldiño hau, izan ere, mendi honen barrenean lurbira osoan den leze edo 'zulorik' handienetako bat dugu, ez bertatik urrun Pozalagua delako haitzulo ospe gaitzekoa. Eta oso malkartsua den mendialde hau Espainia eta Euskal Herriaren arteko mugan dagoela, gaur-egun, jakina dugunez, beste zio bat osterattoa egin dezagun.
Bizkaiko herririk zabalena denez, “denetarik” duela esan genezake, eta Karrantzak zeregin asko, anitz ikusteko, anitz gozatzeko, anitz maitatzeko du. Euskal Herriaren sartaldea da, egun, anbiola, Nafarroako erreterria harago, Ason ibairaino iristen zen arren, eta bai Karrantza bai ondoan dagoen Isasti (Lanestosa) 'itxuraz' kantabriarrak ditugu, bertako baserri, landetxe eta abarren arkitekturari begiraturik. Aipatu biok beste zortzi udalerrirekin batera Enkarterri delako eskualde bizkaitarra osatzen dute, eta hor barru-barruan beste “trebiñu” bat dagoelarik, hots, Turtzioz izeneko zati bat gure lurretik erauzita bezala kolonia anakronikoa. Dena, goiz batez, ikusterik ez, ordea, baina bada hor, urrutira joaiteke, ikustea merezi duenik asko.
Txangora joan nahi duenak izena eman behar du, bazkide izan ala ez berdin, interneten bidez nahiz talde bakoitzaren egoitzan, astearte-ostiraletan, zazpietatik bederatzietara, autobusa bete dadin arte.