aiaraldea.eus

Erabakitzeko eskubidearekin, emakumeak ahaldundu

Erabiltzailearen aurpegia Gure Esku Dago Aiaraldea   Politika

Emakumeak gara eta, nola ez, gure herriko emakume guztien bizi-kalitatea hobetzea dugu helburu. Gure egunerokoan, heteropatriarkatuak ezarritako murru, arazo eta bidegabekeria guztiei aurre egitera behartuta sentitzen gara eta indarkeria matxista dugu horren erakusle nagusi.

Ez da arazo bakarra, ordea. Esaterako, alargunok, besteak beste, pentsio negargarriak jasotzen baititugu, hilabetea pasatzeko estu eta larri ibiltzen garelarik.

Gainera, gizon-emakumeon arteko ezberdintasuna lan arloko ordain-sarietan ere nabarmena eta lotsagarria da. Ardura eta erantzukizun berdinarekin lan egin arren soldata askoz baxuagoak jasotzen ditugu emakume izate hutsagatik.

Gure Esku Dago plataformaren aldarrikapen honekin bat egiten dugunok eta herriko emakumeok zein talde feministetako kideok, badakigu zapalkuntza sistematiko honekin apurtu eta behingoz politikagintzako lehen lerroan kokatzeko nahikoa arrazoi badugula.

Horregatik, burujabe eta aske izateko leku bat nahi dugu munduan. Emakumeok ere, gainontzeko pertsona oro bezala, subjektu politiko aktibo gisa onartuko gaituen jendartearen parte izan nahi dugu, eta aurrerantzean ere, gauden tokian gaudela, jomuga horretan mugitzen jarraituko dugu.

Oraina zein etorkizuneko protagonista gara emakumeok, eta Laudion gauzatuko den herri galdeketan parte hartzeko aukera ere, horren adibide izango da.

Gure buruak ahaldunduta, gure partaidetza eta ekimen propiorako gaitasunak beste behin ere ikusarazita... laudioar guztion ideiak ahalik eta parte hartze handienarekin eta berme guztiekin antolatu eta erabakitzeko unea izango da.

Horregatik guztiagatik, herri galdeketaren alde gaudela adierazi nahi dugu, ozen, hemen bildu garen emakumeok. 2018ko maiatzaren 6an, gu, emakume aske eta burujabeok, bozkatzera joango gara eta herriko emakume guztiei dei egiten diegu, haiek ere, erabakitzeko eskubidea defendatu eta bozkalekuz bozkaleku gauzatu dezaten.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa