"Duela 16 urtetik hona, Amurrioko taldeek beren beharrak asetzen zituzten entsaiatzeko lokal publiko eta autogestionatuak izan dituzte, erreforretik hasita Goia etxera pasatuz.
Denontzat jakina da, Amurrion hainbat eta hainbat musika talde daudela. Amurrioko herrian, denok edo ia denok dakigu udaletxeak kulturarekiko duen jarrera edo politika; horien artean, uda partean ekitaldi baten bat antolatu eta abuztu partean ospatzen diren Amurrioko jaietan mila euroko kontzertuak antolatu. Modu horretan, Amurrioko taldeei ia ezinezkoa egiten zaigu gure herrian, gure lagun eta ezagunen artean jotzea. Orain berdina gertatuko da entsegu lokalekin, ez dakienarentzat esan beharra dago, San Joseko Kuartel zaharrean, udaletxeak 3 entsegu lokal txiki eta espazio gabeetan Amurrioko musika talde guztiak sartu nahi dituela. Konturatuko zarete zer arazo ekar ditzakeen talde ezberdinek m2 gutxiko 3 lokaletan entsaiatzeak: entsaiatzeko leku eza, materiala gordetzeko arazoak eta ordutegi bat finkatzeko arazoak, besteak beste.
Talde asko gainera, leku hau erabili ezinean geratzen dira talde asko daudelako eta talde batzuk lokal pribatuak alokatu behar izan dituzte , horrek ekartzen dituen diru galerak kontuan hartzekoak dira. Gainera, Amurrioko udalak Goia etxean dauden lokalekiko eduki duen ardura desegokia ere salatu beharrean gaude, 15 urtetan ez baitu eskua mugitu guzti honi irtenbide egoki bat bilatzeko. 15 urtetan Amurrioko udaletxeak ahalegin handiegirik ez du egin etxearen edo lokalen mantenimenduan eta konponketan, ez ditu musika taldeen beharrak ezagutu ezta kontuan hartu eta azkarregi zein isilpean 3 lokal berri horiek egin ditu gure iritzirik gabe.
Gu Habemus Papam musika talde garen ikuspuntutik eta lerro hauetan era laburrean aipatu ditugun arazoengatik, gure beharrak asetzen dituen lokal publiko eta autogestionatuengatik borrokan jarraituko dugu. Ez gara Goia etxetik mugituko udaletxeak Amurrioko talde guztientzako alternatiba kultural eta musikal egokia eskaini arte. Honekin batera, herriko beste musikari, musika talde zein kultur talde animatzen dugu borroka honetan parte hartzera.
MUSIKA HERRITIK TA HERRIARENTZAT!"