Azaroaren 19tik Abenduaren 3ra bitarte musika eskaintza zabalaz gozatu ahal izango da Urduñan; Santa Zezilia Musika Bandak eta Udaleko Kultura arloak Urduña Hiriko Musika Astearen edizio berri bat antolatu baitute.
Macastre hiriko “Sociedad Musical Santa Cecilia” musika-bandaren kontzertuak
1.300 bat bizilagun baino ez dituen Valentziako hiri hori musika tradizio handikoa da, eta 60 ikasledun musika eskola du, 35 kidez osaturiko Gazte Banda, 20 kideko hari-orkestra, 40 laguneko koral polifonikoa eta baita 65 musikariz osaturiko Banda Sinfonikoa ere.
Urduñan, Banda Sinfonikoa izango dugu entzungai. Eduardo Carrascosa zuzendari artistiko eta Ricardo Sales Ballester presidente izango direlarik.
Urduñako Santa Zezilia Musika Bandak bi kontzertu eskainiko ditu
Lehenengoa azaroaren 19an izango da eta ohiko laguntzaile duten Gasteizko musika bandaren zuzendaria den Hilario Extremianak zuzenduko du. Kontzertu horretan gaur egungo obrak entzuteko aukera izateaz gain, obra tradizionalez ere gozatu ahalko da.
Bigarren kontzertuan, azaroaren 25ean, umeak izango dira protagonista. Izan ere, umeei zuzendutako kontzertu didaktiko eta pedagogikoa izango da. Helburua umeek musikarekin gozatzea da eta horretarako, besteak beste, bandaren zuzendariak, Jesus Urrutiak, batuta hartzeko aukera emango die umeei.
Azaroaren 26a hiriko musika-taldeei eskainitako eguna izango da, eta 27an herriko Getxa-Goi txistulari bandaren kalejira eta kontzertua entzuteko parada izango dugu Foru Plazan.
Azkenburuko gisa, abenduaren 2an, Jose Ignazio Ansorena zuzendari duen Donostiako txistulari bandak kontzertua eskainiko du. Ume askok Mirri bezala ezagutuko duten arren, txistulari gisa kurrikulum luzea eta kalitatezkoa duela egiaztatu ahalko dute bertaratuek.
EGITARAUA
AZAROAK 19, LARUNBATA, 20:00etan Andra Mari elizan: Urduñako Santa Zezilia Musika Bandaren kontzertua abeslariz lagunduta. Zuzendaria: Hilario Extremiana. Abeslaria: Begoña Divar.
AZAROAK 20, IGANDEA, 12:30etan Andra Mari elizan: Euskal musikaz osaturiko organo kontzertua. Jotzailea: Esther Iñiguez
AZAROAK 25, OSTIRALA, 20:00etan Andra Mari elizan: Umeei zuzenduriko kontzertu pedagogiko eta didaktikoa. Urduñako Santa Zezilia Musika Banda.
AZAROAK 26, LARUNBATA, 20:00etan Andra Mari elizan: Urduña hiriko musika-talde guztien ohiko kontzertua.
AZAROAK 27, IGANDEA, 13:30etan Foru plazan: Getxa-Goi Txistu Bandaren kontzertua.
ABENDUAK 2, OSTIRALA, 20:00etan Andra Mari elizan: Inazio Ansorenaren Txistu kontzertua.
ABENDUAK 3, LARUNBATA, 20:00etan Andra Mari elizan: Macastreko (Valentzia) Santa Zezilia Sozietate Musikalaren kontzertua.