Mugalde Kultur Elkarteak aste honetarako antolatutako ekintza kulturalen azken-burukoa izan zen atzokoa.
Julen Arzuaga idazle eta abokatu aretarrak bere liburu berria aurkeztu zuen atzo Urduñako Kultur Etxean. Espainiako Estatuko hainbat tokitan ere aurkeztu du, Madrilen eta Bartzelonan esaterako, eta harrera oso ona izan omen du.
“La maza y la cantera” goiburu duen liburuak hiru ardatz nagusi dituela azaldu zien Julenek bertaratutako lagunei: lehena errepresioa, bigarrena, euskal gazteria eta hirugarrena, eta azkena, elkartasuna. Hiru ardatz horiek eraman zuten idazlea liburu honetan 1.700 bizipen, 1.700 testigantza, 1.700 amets gaizto biltzera.
"Duela 20 urtetik hona euskal gazteriak bizi duen errepresio basati eta arbitrarioari normaltasun izaera puntu bat eman diogu; batere gauza normala izan barik". Horregatik, errepresioa, atxiloketa, torturak … jasandako zenbait gazte eta batez ere euren senideek bildutako datuak argitaratzeko eta zabaltzeko beharra dago lan honen atzean.
Senideek oso paper garrantzitsua jokatzen dute lan honetan. Izan ere, gazteen aurkako errepresio horren tamaina berekoa baita euren seme-alaba, lagun edo senideen eskubideen defentsan lan egin duen eta lanean jarraitzen duen pertsonen eta, batez ere, gurasoen uholdea. Hirugarren ardatza da hori: elkartasuna. “Gazteriak bizi duen errepresio horrek, gazteak bakarrik ez, euren senide eta lagunak ere zigortzen dituelako”; mezu hori zabaldu zuten familia ugarik eurek kontatutako pasarteen bidez aurkezpen hasieran ikusi ahal izan zen bideo hunkigarrian.